Azərbaycan Beynəlxalq Bankında yeni təyinat

Yeni müşavir təyinata qədər Azərbaycan Mərkəzi Bankının ləğv edilmiş Kredit təşkilatlarının fəaliyyətinə nəzarət Departamentinin xarici nəzarət şöbəsinin müdiri olub.

“Azərbaycan Beynəlxalq Bankı” ASC-də (ABB) yeni təyinat olub.

Oxu.Az Report-a istinadən xəbər verir ki, bankın İdarə Heyətinin sədri Elmar Məmmədov Nəbi Əliyevi özünə müşavir təyin edib.

N.Əliyev buna qədər Azərbaycan Mərkəzi Bankının ləğv edilmiş Kredit təşkilatlarının fəaliyyətinə nəzarət Departamentinin xarici nəzarət şöbəsinin müdiri olub. Departamentin ləğvinə səbəb isə onun funksiyalarının Maliyyə Bazarlarına Nəzarət Palatasına keçməsidir.

Xatırladaq ki, ABB 1992-ci ildə yaradılıb. Onun nizamnamə kapitalı 641287250 manatdır. Bu məbləğ hər birinin nominal dəyəri 0,27 manat olan təxminən 2375138000 səhm əsasında formalaşıb.

Səhmlərin 54,96%-i Azərbaycan hökuməti adından çıxış edən Maliyyə Nazirliyinə, 27,26%-i “Aqrarkredit” bank olmayan kredit təşkilatına, qalan 17,78%-i isə qeyri-dövlət müəssisələri və fiziki şəxslərə məxsusdur.