İrana həkimə gedənlərin qarşısına tələb qoyuldu

Sərhəd keçid məntəqələrində onlardan “hadisə və sağlamlıq sığortası” tələb ediləcək.

İran hökuməti hələ 4 il əvvəl qəbul etdiyi qanunun icrasına başlayıb. Belə ki, bu qanuna əsasən bundan sonra İran ərazisinə daxil olan Azərbaycan vətəndaşlarından icbari şəkildə “hadisə və sağlamlıq sığortası” tələb ediləcək. Bununla bağlı İran islam respublikasının ölkəmizdəki səfirliyi Xarici İşlər Nazirliyinə rəsmi nota verib. İranın Azərbaycanla sərhəd olduğunu və bu ölkəyə azərbaycanlıların daha çox səfər etdiyini nəzərə alsaq məsələ kifayət qədər aktualdır.

İrana gedənlərdən icbari şəkildə “hadisə və sağlamlıq sığortası” tələb ediləcək.

İran islam respublikasının qaydalarına uyğun olaraq artıq İrana səfər edən Azərbaycan vətəndaşlarının icbari sığortası olmalıdır. Sərhəd keçid məntəqələrində onlardan bu sığorta tətbiq ediləcək. Vətəndaşlar bu sığortanı İran və yaxud beynəlxalq səviyyədə tanınan yerli sığorta şirkətlərindən əldə edə bilərlər.

“İran tərəfindən bu qaydalar istər quru, istər hava, istərsə də su yolu ilə ölkəyə daxil olan xarici turistlərə, eləcə də Azərbaycan vətəndaşlarına şamil edilir. Xarici İşlər Nazirliyindən bu barədə Mədəniyyət və Turizm Nazirliyinə məlumat verilib”, – Xarici İşlər Nazirliyinin rəsmisi Hikmət Hacıyev bildirdi.

Artıq Mədəniyyət və Turizm Nazirliyi turizm şirkətlərini bu barədə məlumatlandırıb. Hadisə və sağlamlıq sığortasının bir həftəlik paketləri 5-10 avroya başa gələcək.

Əslində əksər Avropa ölkələrində səfərə çıxmazdan əvvəl insanlar ilk növbədə sığorta olunacaqları şirkəti müəyyənləşdirirlər. Çünki bu ilk növbədə həmin şəxsin özü üçün lazımdır. Sığorta hadisəsi baş verdikdə zərərçəkən şirkətin həmin ölkədə nümayəndəliyi varsa onlarla əlaqə saxlayıb məlumat verilir. Yoxdursa baş vermiş hadisə ilə bağlı çəkilən xərclərin qəbzləri geri qayıdarkən sığorta şirkətinə təqdim edilir və xərc ödənilir. Sığrta hadisəsi baş verdikdə çətinlik yaşanmaması üçün turizm şirkətləri yerli sığorta şirkətlərini müvafiq prosedurlara əməl etməyi təklif edir.

“Biz milli sığorta şirkətini seçmək istəyirik, onlar da İran sığorta şirkti ilə müqavilə bağlamalıdırlar ki, koordinasiya asan olsun həm də sığorta hadisəsi baş verdikdə vətəndaş orada əziyyət çəkməsin”, – Turizim şirkətinin rəhbəri Ruslan Quliyev deyib.

Xüsusi risk qrupuna daxil olan insanlar – idmançılar, yaşı 70-dən çox olan insanlar və xroniki xəstəlikdən əziyyət çəkənlərə bu sığorta tətbiq olunmur.