Argentina səfiri Milli Kitabxanada – FOTO

Qonaqları Azərbaycan Milli Kitabxanasının direktoru prof. Kərim Tahirov qəbul etmişdir. K.Tahirov kitabxana haqqında qısa məlumat verdikdən sonra ötən il Argentina Milli Kitabxanasının direktorunu IV Bakı beynəlxalq kitab sərgisinə dəvət etdiyini, müəyyən səbəblərdən cənab direktorun Bakıya gələ bilməməsini və milli kitabxanalar arasında razılaşdırılmış ikitərəfli qarşılıqlı əməkdaşlıq barədə Memorandumun imzalanma mərasiminin təxirə salındığını bildirdi.

AzNews.info xəbər verir ki, cənab səfir bu görüşün əlaqələrin qurulacağına təkan verəcəyini söylədi. O, Tərcümə Mərkəzi ilə birgə Argentina yazıçılarının əsərlərinin Azərbaycan dilinə tərcümə olunaraq çap olunduğunu dedi və həmin kitabın təqdimatının Milli Kitabxanada keçirilməsini təklif etdi. Bu tədbirin əlaqələrin qurulmasının ilkin addımı olacağını vurğuladı. Təqdimatın Milli Kitabxanada keçirilməsini K.Tahirov məmnuniyyətlə qəbul etdi.

Qonaqlara Azərbaycan Milli Kitabxanası “Fotoalbom” (Azərbaycan, ingilis və rus dillərində), Azərbaycanın mədəniyyət obyektlərini özündə əks etdirən xəritə və Azərbaycan ədəbiyyatı kitabları təqdim edildi.