Azərbaycanlı iş adamından oğlunun oğurlanması xəbərinə reaksiya

Donetsk Azərbaycanlıları Konqresinin sədri Malik Pirverdiyev oğlu Cəlal Pirverdiyevin oktyabrda naməlum şəxslər tərəfindən oğurlanması ilə bağlı mətbuatda yayılan xəbərlərlə əlaqədar KİV-lərə müraciət edib.

Oxu.Az-ın məlumatına görə, müraciətdə bildirilir:

“Oğlum Pirverdiyev Cəlalın oğurlanması barədə bəzi kütləvi informasiya vasitələrində gedən informasiyalar və bundan doğan narahatçılığa görə öncədən təşəkkürümü bildirirəm.

Qeyd edim ki, oğlum Ukrayna Azərbaycanlı Gənclər Birliyinin Donetsk Vilayət təşkilatının sədri Pirverdiyev Cəlal oktyabrın 13-dən 14-ə keçən gecə Kiyevdə müəmmalı şəkildə naməlum şəxslər tərəfindən oğurlanıb. Bununla bağlı artıq Ukraynanın hüquq-mühafizə orqanlarına müraciət edilib. Hazırda hadisə ilə bağlı araşdırma aparılır.

Bəzi mətbuat orqanlarında oğlumun oğurlanmasının hansısa məlum qüvvələr tərəfindən həyata keçirildiyi barədə məlumat yayılıb. Onun atası kimi bəyan edirəm ki, oğlum Pirverdiyev Cəlalın hansısa qüvvələr tərəfindən oğurlanması barədə yayılan informasiyaların heç bir əsası yoxdur. Məsələnin mənəvi tərəfinin ağırlığını başa düşərək hər bir media nümayəndəsinin keçirtdiyi narahatlığı anlayır, bu məsələdə təsdiqini tapmayan informasiyanın mənfi fəsadlar verməməsində mənə yardımçı olmağınıza əminliyimi bildirirəm”.