Komitə daha 10 dini icmaya maliyyə yardımı ayırdı

Dini Qurumlarla İş üzrə Dövlət Komitəsi daha 10 dini icmaya maliyyə yardımı ayırıb.

Oxu.Az-a bu barədə komitədən bildirilib.

Dövlət Komitəsi sədrinin birinci müavini Səyyad Salahlı bu cür yardımların əhəmiyyətindən danışıb:

“Maliyyə vəsaitinin ayrılması ilə bağlı icmalar tərəfindən təqdim edilən layihələrin məqsədi yerlərdə dini maarifləndirmə işlərinin yüksək səviyyəyə çatdırılması, dini radikalizm və ekstremizmin mahiyyətinin izah olunması, İslam dini ənənələrimizin və milli-mənəvi dəyərlərimizin daha geniş şəkildə ictimaiyyətə çatdırılmasıdır.

İcma sədrlərinə həyata keçirəcəkləri layihələrin əsas hədəflərinin gənclər olmasının vacibliyi tövsiyə edilib”.

Qeyd edək ki, komitə tərəfindən Prezident İlham Əliyevin 27 noyabr 2014-cü ildə imzaladığı Sərəncama uyğun olaraq 67 dini icmaya maliyyə yardımı verilib ki, bunların da 19-u qeyri-islam, 48-i isə İslam dini icmalarıdır.

Onu da əlavə edək ki, verilən vəsait hesabına dini maarifləndirmə və milli-mənəvi dəyərlərimizin təbliği istiqamətində icmalar tərəfindən yerlərdə tədbirlər keçirilməkdədir.