Yəmənə düşən bomba məşhur boksçunu öldürdü

Dünya rekordçusu olan boksçu həlak olub.

ANS PRESS-in məlumatına görə, birinci raundda qazandığı qələbələrin sayına əsasən rekordçu hesab edilən yəmənli peşəkar boksçu Ali Raymi ölkəsində aparılan hava hücumlarının qurbanı olub. Bu barədə xəbəri idmançının meneceri Feliks Arno “Ring TV”nin amerika saytına verib.

“41 yaşlı bokçsu mayın 23-də ölkənin paytaxtında “Ərəb koalisiyası”nın bomba hücumu zamanı həlak olub. Təəssüf ki, bu həqiqətdir”, – deyə idmançının meneceri bildirib.

O, 2013-cü ilin noyabrında birinci raundda qələbələrinin sayına görə dünya rekordçusu seçilib. İdmançı keçirdiyi 25 döyüşün hamısında nokautla qələbə qazanıb.

İdmançı Ümumdünya boks assosiasiyasının (VBA) reytinqində 6-cı yeri, 48,98 kq-a qədər çəki kateqoriyasında isə Ümumdünya boks təşkilatının reytinqində (VBO) 8-ci yeri tuturdu.