Müdafiə Nazirliyi təlimat yaydı: ruslar hücuma keçəndə nə etməli...

Rusiya ilə NATO arasında gərginliyin günbəgün artdığı bir vaxtda Litvada Müdafiə Nazirliyi əhalini rusların potensial hücumuna hazırlamaq üçün təlimat-büroşüra yayır.

Virtualaz.org xəbər verir ki, 75 səhifəlik büroşüra on minlərlə nüsxədə dərc olunub, habelə internet üzərindən yayılır. Təlimatın əvvəlki versiyası ötən il dərc edilmişdi və indi Müdafiə Nazirliyi sənədi genişləndirərək daha detallı şəkildə yayıb.

Təlimatda Rusiya qoşunlarının Litvaya hücumu zamanı əhalinin necə hərəkət etməli olduğu göstərilir. Müdafiə Nazirliyinin təlimatına əsasən əhali mümkün qədər sığınacaqlarda, habelə meşəlik ərazilərdə gizlənməli, partizan müqaviməti üçün hazırlıqlara başlamalıdır. Habelə büroşürada meşəlik ərazidə, vəhşi təbiətdə sağ qalmağın yolları başa salınır.



Sənəddə deyilir ki, Rusiya öz qonşularına hücum etməkdən çəkinmir və Litva potensial hədəflərdən biridir. Büroşürada Rusiya ordusunun müxtəlif tipli tankları, ammunisiyaları və minaları təsvir olunur. “Ən mühüm olanı budur ki, vətəndaşlar ayıq-sayıq olsunlar və müqavimət göstərmək iradəsini əldən verməsinlər. Bu elementlər olanda təcavüzkar hərbi müdaxilə üçün mühit yaratmaqda çətinlik çəkəcək”-Müdafiə Nazirliyi bildirir.

Bu sənədin yayılması NATO ölkələrinin Baltik regionunda və Şərqi Avropada Rusiyanın potensial hücumuna qarşı batalyonlar yerləşdirdiyi bir vaxtda baş verir. 2017-ci ildə alyans Şərqi Avropada dörd batalyon yerləşdirəcək, bunlardan biri Polşada, qalanları Baltik ölkələrində dislokasiya olunacaq. ABŞ isə 900 hərbçi və tankla yerləşdirəcəyini açıqlayıb.



Lakin bu günlərdə ABŞ-ın nüfuzlu “RAND Corporation” şirkəti Pentaqonla birgə keçirdiyi növbəti təlimlərin nəticələrinə əsasən bildirib ki, Şərqi Avropadakı NATO qüvvələri Rusiyanın Baltik ölkələrinə hücumunun qarşısını almaq üçün yetərli deyil, olduqca cüzidir. Vəd olunan batalyonların yerləşdirilməsindən sonra NATO-nun şərq cinahında cəmi 4 minə qədər canlı qüvvə olacaq ki, hazırda Rusiyanın təkcə Kalininqrad vilayətində on minlərlə hərbçisi, minlərlə texnikası var. Rusiyanın Qərb hərbi dairəsinin qüvvələri isə 360 min nəfərdir. “RAND Corporation” bütün bunları hesablayaraq bildirib ki, Rusiyanın üç Baltik ölkəsinin paytaxtını tutmasına əvvəl hesab edildiyi kimi 60 yox, cəmi 36 saat vaxt lazım olacaq.