ABŞ Rusiyanın potensial nüvə müharibəsi ssenarisini qiymətləndirib

Rusiya düşmənə nüvə zərbəsini birinci endirməklə hədə-qorxu gələ bilər. Moskva bu yolla münaqişənin həllini öz xeyrinə dəyişmək məqsədilə avropalılara təzyiq göstərməyə çalışacaq.

Oxu.Az Lenta.ru-ya istinadən xəbər verir ki, bu barədə Pentaqonun yeni dərc olunmuş nüvə doktrinasında qeyd olunur.

Sənədə görə, ABŞ-ın əsas düşmənləri Rusiya və Çin olsa da, Vaşinqton hər iki ölkə ilə sabit münasibətlər qurmağa çalışır.

ABŞ prezidenti Donald Tramp bildirib ki, bu doktrina nüvə silahından istifadə ehtimalının aşağı salınmasına xidmət edir. Ağ Ev rəhbərinin sözlərinə görə, digər ölkələr nüvə arsenalını zənginləşdirdiyi bir vaxtda öncəki ABŞ administrasiyası nüvə silahları, infrastrukturu və çatdırılma vasitələrini müasirləşdirmək istəməyib.

“Doktrina silahlanmaya nəzarət və nüvə silahının yayılmaması ilə bağlı siyasi prinsiplərimizə sadiq qaldığımızı əks etdirir, nüvə sınaqlarına olan moratoriumu qüvvədə saxlayır, həmçinin nüvə terroruna qarşı reaksiya, onun müəyyənləşdirilməsi və qarşısının alınmasında qətiyyətli olduğumuzu ifadə edir”, – deyə Tramp bildirib.