Ermənistanda hərbçilərlə komandirlər arasında dava: İki əsgər güllələndi

Hər dəfə Azərbaycanla Ermənistan arasında Dağlıq Qarabağ məsələsinin həlli istiqamətində müəyyən konsensusun əldə edilməsi gündəmə gələndə, Ermənistan tərəfi müxtəlif hadisələr törətməklə, ölkə və beynəlxalq ictimaiyyətin diqqətini yayındırmağa çalışır.

Oxu.Az-ın məlumatına əsasən, işğal olunmuş torpaqların bir hissəsinin Azərbaycana qaytarılması ilə əlaqədar hər iki dövlətin XİN rəhbərlərinin görüşünün keçirilməsi fonunda Ermənistan ordusunda növbəti bədbəxt hadisənin baş verməsi buna bir daha sübutdur. Nəticə isə məlumdur, Ermənistanın hərbi-siyasi rəhbərliyi orduda neqativ halların baş verməsində bilavasitə maraqlıdır.

Son zamanlar Ermənistan ordusunda neqativ halların durmadan artması sirr deyil və bu barədə məlumatlar erməni sosial mediasında əsas müzakirə edilən mövzulardandır.

Diqqəti cəlb edən məqamlardan biri isə erməni sosial şəbəkə istifadəçilərinin Ermənistan silahlı qüvvələrində baş verən bir çox hadisələrin ölkə rəhbərliyi və yuxarı komandanlığın tapşırıqlarına əsasən, hərbi hissə komandirləri tərəfindən təşkil olunduğu barədə məlumatların yer almasıdır.

Erməni sosial mediasında hiddətlə müzakirə olunan növbəti məsələ Laura adlı "Facebook" istifadəçisinin qohumunun ağır yaralanması barədə etdiyi paylaşımdır. Onun sözlərinə görə, Madagizdə yerləşən hərbi hissədə xidmət edən qohumu Narek Zarqaryanla digər hərbi qulluqçu Yura Hakopyan döyüş postunda olan zaman post komandiri tərəfindən təhqirlərə və alçaldıcı hərəkətlərə məruz qalıblar. Komandirin bu hərəkətlərinə etiraz edən hərbi qulluqçular güllələnərək, ağır bədən xəsarəti ilə hospitala yerləşdiriliblər. Hazırda hər ikisinin vəziyyəti ağırdır.