Avropa Şurasından Ərdoğan bəyanatı

Avropa Şurası da Türkiyədəki çevrilişlə bağlı açıqlama verib.

ANS PRESS-in məlumatına görə, təşkilatın yaydığı bəyanatda bildirilir ki, ölkənin demokratik yollarla seçilən prezidentinə qarşı çevriliş cəhdi qəbuledilməzdir.

Eyni zamanda Böyük Britaniyanın Xarici İşlər Nazirliyi Türkiyədə olan vətəndaşlarına ictimai yerlərdən uzaqlaşmağı məsləhət görüb. XİN açıqlamasında bildirib ki, ölkədə vəziyyət sakitləşənə kimi bu tələb qüvvədə olacaq.
Daha əvvəl ABŞ-dan Türkiyədəki dövlət çevrilişinə açıqlama gəlib.

Dövlət katibi Con Kerri deyib ki, ABŞ Türkiyədəki hadisələrin səngiyəcəyinə ümidvardır.

Rusiya da ölkədə baş verənlərlə bağlı açıqlama verib. Rusiyanın xarici işlər naziri Sergey Lavrov Rusiya vətəndaşlarına müraciət edərək deyib ki, Türkiyəyə getməkdən yayınsınlar. "Bu çox təhlükəlidir. Xüsusilə uşaqlar üçün”.

Türkiyədə axşam saatlarından başlayaraq ordunun hakimiyyəti ələ keçirdiyi barədə məlumatlar yayılıb. Amma Türkiyə prezidenti Rəcəb Tayyib Ərdoğan sadəcə dövlət çevrilişinə cəhd olduğunu deyir. Ərdoğan hazırda ölkənin rəhbəri olduğunu deyib.