Qərb kəşfiyyatı Rusiyanın Suriyada baş tutmayan “blitskriq"-indən yazdı

Suriyada hərbi kampaniyaya başlayarkən Rusiya ölkə ərazisini tez bir zamanda Əsəd rejiminin oponentlərindən təmizləməyi planlaşdırırdı. Amma bir sıra amillər buna mane oldu.

Oxu.Az xəbər verir ki, bu barədə “Financial Times” qəzetinə Avropa xüsusi xidmət orqanlarındakı adının çəkilməsini istəməyən mənbə bildirilib.

“Rusiyanın ilkin planı sürətli hərbi kampaniya ilə bir neçə ay ərzində Əsəd qüvvələrinin Türkiyə sərhədinə qədər olan əraziləri ələ keçirməsinə, Hələb üzərində nəzarəti tam bərpa etməsinə yardımçı olmaqdan ibarət idi.

Eyni zamanda, mötədil müxalifətin o həddə qədər zəiflədilməsi nəzərdə tutulubmuş ki, ABŞ onlara dəstəkdən imtina etmək və İŞİD-ə qarşı mübarizədə Rusiya ilə bərabər iştirak etmək məcburiyyətində qalsın”, - o bəyan edib.

Onun sözlərinə görə, müxaliflərin gözləniləndən daha güclü müqavimət göstərməsi, Türkiyə ilə qarşıdurmanın yaranması, İranın hərbi təsirinin güclənməsi və neftin qiymətlərinin uzun müddət 40 dollar civarında qalacağının bəlli olması Moskvanın bu hərbi ekspedisiyada imkanlarını ciddi şəkildə məhdudlaşdırıb.

Rusiya 2015-ci ilin sentyabr ayının 30-dan Suriya pezidenti Bəşər Əsədin xahişi ilə ölkədə hərbi əməliyyatlar aparırdı. Rusiya qruplaşmasının əsas qüvvələrinin Suriya bazasından çıxarılmasına dair əmri prezident Vladimir Putin mart ayının 14-də verib.

Qeyd edək ki, “blitskriq” almancadan tərcümədə “ildırımsürətli müharibə” deməkdir.