"İpək Yolu" ilə hərəkət edən ilk qatar Tiflisə çatıb – FOTO

Gürcüstanda “İpək dəmir yolu”nun rəsmi açılışı baş tutub.

ANS PRESS-in məlumatına görə, Çinin Lyanyunqan terminalından yola düşən tranzit qatar bu gün Tiflisə çatıb.

Qatarı qarşılayanlar arasında Gürcüstanın baş naziri İrakli Qaribaşvili də olub. Onun sözlərinə görə, layihə çərçivəsində Çinin şərgindən Avropaya yüklər Qazaxıstan, Azərbaycan və Gürcüstanla ərazisi ilə daşınacaq.

“Mən şadam ki, bizim qatar rəmzi olaraq Gürcüstan, Azərbaycan, Qazaxıstan və Aİ-nin bayraqları ilə bəzədilib. “İpək yolu” – Asiyadan Avropaya olan ən qısa yoldur. “İpək yolu” – siyasi, mədəni və iqtisadi münasibətlərin inkişaf etdirilməsi üçün əlavə impulsdur”, - deyə Qaribaşvili bildirib.

***10:03***

Bu gün Rusiya ərazisindən yan keçməklə Çindən Türkiyəyə gedən ilk tranzit qatar Gürcüstanın paytaxtı Tiflisə çatacaq.

ANS PRESS-in Gürcüstan nazirlər kabinetinə istinadən verdiyi məlumata görə, Çinin Lyanyunqan terminalından yola düşən qatar Tiflisə yerli vaxtla saat 10:30-da çatacaq. Gürcüstan hökumətinin məlumatında qeyd olunur ki, “qatarın gəlişi ilə “İpək Yolu” rəsmən açıq elan ediləcək.” Təntənəli tədbirdə baş nazir İrakli Qaribaşvili və Çinin Gürcüstandakı səfiri Yu Bin iştirak edəcəklər.
İlin sonuna qədər Gürcüstana daha bir tranzit qatar gələcək, 2016-cı ildən isə Tiflisdə minlərlə konteyner qəbul etməyə hazırlaşırlar. Gürcüstan hökumətinin məlumatına görə, gələcəkdə tranzit qatarlar Çindən İstanbula 15 gün ərzində çatacaq. Hazırda yüklərin dəniz yolu ilə daşınması 40-45 sutka təşkil edir.

Çin və Türkiyə Qazaxıstan, Azərbaycan və Gürcüstanla birgə noyabrın 30-da yük daşınmaları məqsədi ilə konsorsium təsis etmək haqqında qərar qəbul ediblər. Müvafiq razılaşma tərəflər arasında noyabrın 28-i İstanbulda imzalanıb.

Türkiyə, Gürcüstan, Azərbaycan və Qazaxıstan nəqliyyat dəhlizi


Razılaşma “Azərbaycan Xəzər Dəniz Gəmiçiliyi” QSC və Azərbaycanın “Karvan lojistik” şirkəti ilə yanaşı Çinin "Mishgeng Logistics" şirkəti, “Qazaxıstan Dəmir Yolları”nın törəmə “KTJ ekspress” müəssisəsi, həmçinin “Gürcüstan Dəmir Yolları”nın törəmə strukturu "Trans Caucasus" Terminals ilə əldə olunub.

Türkiyə tərəfi konsorsiumda assosiasiyalaşdırılmış üzv kimi təmsil olunur.

Sənəddə qeyd olunur ki, razılaşma Çin-Türkiyə-Avropa transxəzər nəqliyyat marşrutunun imkanlarının təqdimatı zamanı əldə olunub. Əldə olunan razılığa əsasən Çindən daşınan yüklər Rusiya ərazisindən yan keçəcək.

"İpək yolu"nun bərpasına xidmət edən bu layihə Azərbaycanı beynəlxalq yüklərin daşınmasında tranzit ölkəyə çevirir .

Ötən həftə isə prezident İlham Əliyevin Çinə səfəri baş tutub.

Səfər çərçivəsində İlham Əliyev “İpək Yolu İqtisadi Kəməri”nin yaradılmasının birgə təşviqi və iki ölkənin dəmir yolları arasında əməkdaşlıqla bağlı müqavilə imzalayıb.