“BP-Azerbaijan” şirkətində növbəti ixtisar dalğası?

Son vaxtlar sosial şəbəkələrdə “BP-Azerbaijan” şirkətində növbəti ixtisar dalğasının başlaması barədə məlumatlar yayılıb, Oxu.Az xəbər verir.

Bildirilir ki, hazırda “BP-Azerbaijan” şirkəti orta və aşağı kateqoriyalı əməkdaşlarını ixtisar edir.

Ümumilikdə şirkətin 300-ə yaxın şirkət əməkdaşının (ümumi əməkdaş sayının 10%-i) ixtisar olunacağı qeyd olunur.

İşdən çıxarılan əməkdaşlara 3-6 aylıq maaşlarının da verildiyi bildirilir.

Oxu.Az məsələ ilə bağlı şirkətin mətbuat xidmətinin rəhbəri Tamam Bayatlı ilə əlaqə saxlayıb.

T. Bayatlı isə yayılan məlumatları təkzib edib:

“Hal-hazırda “BP-Azerbaijan” şirkətində ixtisar yoxdur. Belə bir şey olarsa, əvvəllər olduğu kimi ictimaiyyətə bu barədə məlumat verəcəyik. Biz 2015-ci ilin yanvar ayında olan ixtisarlar barəsində məlumat vermişdik. Bildirmişdik ki, onlardan neçəsi azərbaycanlı, neçəsi xarici vətəndaşdır. Lakin hazırda şirkətdə ixtisarlar aparılmır, yayılan məlumatlar həqiqətə uyğun deyil” - deyə, şirkətin mətbuat xidmətinin rəhbəri qeyd edib.

Qeyd edək ki, ötən ilin yanvarında da Oxu.Az “BP-Azerbaijan”da gedən ixtisarlarla bağlı yazmışdı.

Məlumatda qeyd olunurdu ki, hər gün şirkətdən 40 nəfərədək işçi çıxarılır. O zaman da işdən çıxarılan əməkdaşlara həmin şirkətdə çalışma müddətindən asılı olaraq, 3 yaxud 6 aylıq məvacibi verilirdi. Ən böyük həcmdə kompensasiyanı şirkətin 18 il əmək stajına malik olan qadın əməkdaşı almışdı - ona 100 min manata yaxın məbləğdə birdəfəlik vəsait ödənilmişdi.

Elə həmin gün bəyanatla çıxış edən şirkət rəsmisi Tamam Bayatlı yayılan məlumatları təsdiqləmişdi. Həmin dövrdə şirkət ümumilikdə 255 əməkdaşını ixtisar etmişdi.