Sarkisyan Putinə şikayət etdi: Azərbaycan artilleriyadan istifadə edir

Ermənistan prezidenti Serj Sarkisyan Düşənbədə KTMT sammitində Dağlıq Qarabağda vəziyyətin gərginləşməsi barədə danışacaq.

Oxu.Az RİA Novosti-yə istinadən xəbər verir ki, bu barədə Sarkisyan Rusiya prezidenti Vladimir Putin ilə görüş zamanı deyib.

“Rusiyaya Qarabağ münaqişəsinin həllində verdiyi töhfəyə görə minnatdarlığımı bildirirəm. Son iki həftə ərzində sərhəddə vəziyyət çox gərginləşib. Azərbaycan tərəfi iriçaplı silahlarla yanaşı, artilleriyadan da istifadə edir. Əlbəttə, biz cavab vermək məcburiyyətindəyik. Mən bu barədə Düşənbədə KTMT sammitində ətraflı danışacağam”,- Ermənistan prezidenti bildirib.

Sarkisyan həmçinin Rusiyaya Ermənistana 200 milyon dollar güzəştli kredit ayırdığına görə təşəkkür edib.

“Ermənistana 200 milyon dollar məbləğində güzəştli kreditin ayrılması barədə müqavilə imzalanıb. Bu vəsait erməni silahlı qüvvələrinin arsenalını yeniləməyə imkanı verəcək”,- o əlavə edib.