Prezidentin səlahiyyət müddəti başa çatdı

İraqda Kürdüstan parlamenti muxtar regionunun prezidenti Məsud Bərzaninin səlahiyyətlərinə dair qanun layihəsi ilə əlaqədar gözlənilən səsvermə baş tutmayıb. ANS PRESS-in məlumatına görə, buna səbəb parlamentdə kifayət qədər qanunvericinin iştirak etməməsi olub. Qanun layihəsində prezidentin səlahiyyətlərinin məhdudlaşdırılması nəzərdə tutulur.

Ötən gün Bərzaninin prezidentlik müddəti başa çatıb. Lakin Bərzani belə bir dönəmdə vəzifəsini tərk etməkdən imtina edib. Bərzaninin Kürdüstan Demokratik Partiyası prezident hakimiyyəti tərk edəcəyi təqdirdə regionda qeyri-stabil vəziyyətin daha da çətinləşəcəyini bildirib.

Prezidentin vəfizədə qalmasına qarşı çıxan partiya mənsubları isə vəziyyət dəyişməz olaraq qalarsa, bunun pis nəticələr doğura biləcəyini deyib.

“Tarix onları bağışlamayacaq. Unutmayın ki, sabahdan etibarən Kürdüstan kritik vəziyyətlə üzləşəcək. Çünki prezident öz legitimliyini itirəcək və vəzifə müddəti başa çatmış olacaq. Müvəqqəti olaraq isə parlament sədri onun vəzifəsini 60 gün müddətində icra etməlidir.” - deyə Dəyişiklik Hərəkatının lideri Birzo Məcib bildirib.

Peşmərgə kürd qüvvələri artıq uzun müddətdir ki, İŞİD qruplaşmasına qarşı mübarizə aparır. Vəziyyətlə əlaqədar bölgədə, eyni zamanda, iqtisadi böhran dərinləşib.