Türkiyədən daha bir şəhid xəbəri – FOTO

Türkiyənin Qars vilayətində hərbçilərdən biri minaya düşüb.

ANS PRESS-in məlumatına görə, terrorçuların Kağızman-Iğdır-Erzurum magistral yolunda xəndək qazaraq avtomobilləri alovlandırdıqdan sonra təhlükəsizlik qüvvələri bölgəyə cəlb olunub.

Təhlükəsizlik qüvvələrinin əməkdaşları terrorçuların maşınları yandırdığı ərazidə araşdırma apararkən mina partlayıb.

Partlayış nəticəsində Jandarma komandanlığının çavuşu 35 yaşlı Ali Gökçe şəhid olub.

Şəhidin meyiti xəstəxanaya gətirilib

Ötən gün Türkiyənin Van vilayətində daha iki PKK terrorçusu zərərsizləşdirilib.

PKK terrorçuları vilayətin Çatak rayonunda Jandarma Komandanlığı və polis bölməsinə silahlı hücum ediblər.

Belə ki, terrorçular eyni zamanda Jandarma Komandanlığını və ondan 1 kilometr aralıda yerləşən polis bölməsini atəşə tutublar. Əsgər və polislər terrorçulara dərhal qarşılıq verib.

Atışma zamanı iki terrorçu öldürülüb, biri isə yaralanıb.

Hücumlardan sonra bölgədə havadan dəstəkli əməliyyat başladılıb. "Kobra" helikopterlərinin dəstəyi ilə həyata keçirilən əməliyyatlar davam edir. Terrorçular havanın qaranlığından istifadə edərək gizlənməyi bacara bilib.

Terrorçuların hücum etdiyi ərazi

Ölkənin şərqində yerləşən Ağrı vilayətində isə 3 PKK terrorçusu zərərsizləşdirilib.

Türkiyə terrora qarşı mübarizə idarəsi və xüsusi xidmət orqanlarının dəstəyi ilə Ağrı vilayətində aparılan əməliyyat nəticəsində 3 PKK terrorçusu zərərsizləşdirilib.

Evlərdən birinə axtarış aparmaq üçün daxil olan polisə PKK üzvləri silahlı müqavimət göstəriblər. Nəticədə terrorçular məhv edilib.