FES rəhbəri vəzifədən gedir

ABŞ-ın Federal Ehtiyat Sisteminin rəhbəri Canet Yellen dörd illik xidmətdən sonra vəzifədən gedir.

Oxu.Az xəbər verir ki, bu barədə “Bloomberg” məlumat yayıb.

Məlumata görə, Vaşinqtonda FES rəhbərini təntənəli şəkilə yola salmaq üçün hazırlıqlar gedir, vida mərasimində Federal Ehtiyat Sisteminin yüzlərlə əməkdaşı iştirak edəcək. Onlar hətta mərasim üçün sosial şəbəkələrdə #PopYourCollar – “Yaxalığını qaldır” heşteqini fikirləşib. Yellenin məhz bu cür geyim üslubundan xoşu gəlir. Ona hədiyyə olaraq Federal Ehtiyat Sisteminin binasından dalğalanmış bayraq hədiyyə edilib.

ABŞ prezidenti Donald Tramp Yellenin ikinci müddətə FED rəhbəri qalmasını məqsədəuyğun bilməyib. Bu, gözlənilən qərar idi. Belə ki, Ağ Ev rəhbəri əvvəllər aşağı uçot dərəcəsi faizlərinə görə Yelleni tənqid atəşinə tutub.

Fevralın 3-dən Federal Ehtiyat Sistemin başına Cerom Pauel gələcək. Onun namizədliyi hələ yanvar ayında Senat tərəfindən təsdiqlənib.

Yellen postdan getdikdən sonra Brukinqs İnstitutunun Maliyyə, pul və kredit siyasəti üzrə Hatçins Mərkəzində işləyəcək.