İnvestisiya şirkəti: SOCAR istiqrazı almaq istəyənlər kəskin artıb

SOCAR istiqrazlarının ilk faiz ödəməsi əhalinin bu kağızlara marağını kəskin artırıb.

Oxu.Az xəbər verir ki, bu barədə investisiya şirkətlərindən bildirilib.

SOCAR-ın buraxdığı istiqrazlara görə, ilk faiz ödənişinin həyata keçirilməsindən sonra investisiya şirkətlərinə bu kağızları almaq üçün müraciətlər çoxalıb.

Gözləntilərin doğrulması, yəni istiqrazlar üzrə faizlərin ödənişi vətəndaşların istiqrazlara yatırım vasitəsi kimi inamını artırıb.

Digər tərəfdən, bazarda çevik və gəlirli investisiya aləti olan SOCAR istiqrazları öz rəqiblərini üstələyir. “Kapital menecment” investisiya şirkətinin analitiki Cəfər İbrahimli hesab edir ki, bunun səbəblərindən biri insanların bəzilərinin indiyədək gözləmə mövqeyi tutmasıdır:

“Bəzi investorlarda gözləmə mövqeyi var idi. İnsanlar bilmək istəyirdilər ki, istiqrazlar üzrə vədlər necə yerinə yetiriləcək, onlar vaxtında geri alınacaqmı, orda qoyulan şərtlər emitent və ya marketmeyker tərəfindən yerinə yetiriləcəkmi və ya faizlər deyilən vaxtda və şərtlərdə icra olunacaqmı?”.

Mütәxәssis bildirir ki, istiqrazlar üzrə bütün şərtlər bu günə qədər icra olunub:

“Hesab edirəm ki, bu investorlar üçün daha cəlbedici olacaq və investorların istiqrazlara marağı daha da artacaq”.

C.İbrahimli bildirir ki, hazırda bazarda dollarla buraxılan, gəlirliyi və digər parametrlərinə görə, SOCAR istiqrazları ilə müqayisə edilə bilən alətlər yoxdur:

“2016-cı ilin əvvəlində Maliyyə Nazirliyi dollarla istiqraz buraxmışdı - illik 3,5% gəlirlilikdə, amma sonradan onların buraxılması dayandırıldı”.

Dollarla vəsaitin yatırılması üçün digər üsul olan banklar da istiqrazlarla müqayisə edilə bilmir: “Banklara əmanət şəklində yerləşdirilməni sığortalanma çərçivəsində nəzərə alsaq, gəlirlilik 3%-dir. Hətta bəzi banklar 3%-dən də aşağı, 1-3% gəlir təklif edirlər”, - deyə C.İbrahimli qeyd edib.

Xatırladaq ki, SOCAR-ın 5 il müddətinə buraxdığı istiqrazların ümumi həcmi 100 milyon dollar, 1 ədədinin nominal dəyəri 1000 dollardır. SOCAR istiqrazlarının illik gəliri 5% təşkil edir, bu faizlər rübdə bir dəfə ödənilir.

Faiz ödənişləri də dollarla həyata keçirilir. İstiqrazları istənilən vaxt təkrar bazarda satmaq, ən azı nominal dəyərinə geri qaytarmaq mümkündür.

İstiqrazlar üzrə ilk faiz ödənişi yanvarın 17-də baş tutub. Belə ki, istiqrazların bazara buraxılmasından sonra ilk 3 ayın sonunda istiqraz sahiblərinə, ümumilikdə 1 milyon 250 min dollar faiz ödənib. Növbəti faiz ödənişləri aprel, iyul və oktyabr aylarının 17-də həyata keçiriləcək.