Neftin qiyməti yenidən ucuzlaşır

ABŞ-da ehtiyatların artma ehtimalı neftin qiymətini aşağı salır.

Dünya bazarında neftin qiyməti ucuzlaşır.

Oxu.Az Bloomberg-ə istinadən xəbər verir ki, Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI neftinin qiyməti 1 barelə görə 0,51% ucuzlaşaraq 43,08 dollar təşkil edib.

ICE London qitələrarası birjasında Brent markalı neftin 1 barelinin dəyəri isə 0,28% azalaraq 45,82 dollar olub.

Dünən səhər saatlarında Brent və WTI neftinin qiyməti bir barelə görə müvafiq olaraq 46,54 və 43,81 dollar olmuşdu.

APA-nın məlumatına görə isə, ötən gün 0,5%-lik bahalaşmadan sonra dünya bazarında təklifin yüksək olması səbəbindən neft ucuzlaşmağa başlayıb.

ABŞ-ın Energetika Nazirliyi rəsmi statistikanı açıqlayacağı bir vaxtda “Standard & Poor`s” beynəlxalq reytinq agentliyi ötən həftə bu ölkənin ehtiyatlarını 2,8 milyon barel həcmində qiymətləndirib.

“Bloomberg” agentliyi analitiklər arasında apardığı sorğuya görə, neft ehtiyatlarında yüksək, təxminən 3,1 milyon barel artım qeydə alınacaq.