Təbii qazın vəziyyəti müzakirə olunacaq – FOTO

Noyabrın 23-də Tehranda Qaz İxracatçısı Dövlətlərin Forumunun (QİDF) toplantısı keçiriləcək.

Bu barədə məlumat verən İranın neft naziri Bijən Nəmdar Zəngənə bildirib ki, dünya təbii qaz bazarındakı tələb və təklifdə müşahidə edilən dəyişiklərlə əlaqədar toplantıya QİDF-ə üzv olan dövlətlərin rəhbərləri dəvət edilib. Tədbirdə dünya təbii qaz bazarındakı vəziyyət, təbii qaz ixracının artırılması ilə yanaşı tələbat və təklifin tənzimlənməsi, qaz kəmərlərinin təhlükəsizliyinin təmin edilməsi kimi məsələlər müzakirə ediləcək. Toplantı çərçivəsində bir sıra ikitərəfli görüşlərin keçirilməsi də nəzərdə tutulub.



B.Zəncənə nəzərə çatdırıb ki, İran toplantıda Azərbaycanla birgə qaz əməliyyatlarının aparılması məsələsini müzakirə edəcək.

QİDF-nin mənzil-qərargahı Qətərin paytaxtı Doha şəhərində yerləşir. Rusiya, Qətər, Əlcəzair, Boliviya, Misir, Liviya, Venesuela, Peru, Birləşmiş Ərəb Əmirlikləri, Nigeriya Forumun aparıcı üzvləridir, Hollandiya, Qazaxıstan, Norveç və İraq Forumun müşahidəçi üzvləridir. Dünya qaz istehsalının 42 faizi QİDF dövlətlərinin payına düşür. Bu dövlətlər dünya qaz ehtiyatının 70 faizinə malikdirlər.