Türk Hava Yollarından Fransaya uçuşlar ilə əlaqədar – AÇIQLAMA

Türk Hava Yolları Fransaya uçuşları tamamən dayandırmayıb.

Bu barədə Oxu.Az-a Türk Hava Yollarının (THY) Bakı ofisindən bildirilib.

Şirkətin Bakı ofisindən qeyd olunub ki, Türk Hava Yolları noyabrın 13-də Fransada baş verən terror hadisələri ilə əlaqədar noyabrın 14-dən 21-dək nəzərdə tutulmuş uçuşlar üçün aşağıdakı şəkildə bir dəyişiklik edib:

“Noyabrın 14-dən 21-dək nəzərdə tutulmuş ucuşlar üçün biletlərini noyabrın 14-dən əvvəl sifariş edən və Türkiyədən Fransaya (Paris, Lyon, Nice, Tuluza, Bordeaux) səyahət etməyi planlaşdıran yolcularımız hər-hansı bir cərimə ödəmədən səyahət tarixlərini noyabrın 14-dən dekabrın 14-dək olan tarixlər arasında hər-hansı bir günlə əvəz edə bilərlər.

Biletlərini qeyd olunan başqa bir günlə əvəz etmək arzusunda olanlar noyabrın 21-dək THY-ə müraciət edə bilərlər.

Bu tənzimləmə noyabrın 14-dən 21-dək etibarlı olacaq”, - deyə Bakı ofisindən qeyd edilib.

Şirkətdən onu da qeyd ediblər ki, biletlərin qaytarılması ilə əlaqədar isə hər-hansı dəyişiklik nəzərdə tutulmayıb.

Qeyd edək ki, Türkiyə KİV-də qeyd olunmuşdu ki, THY Fransaya uçuşları noyabrın 21-dək tamamən dondurub.