ABŞ-da hərbi obyektə hücum: 4 ölü – FOTO

ABŞ-ın Tennessi əyalətində iki hərbi nöqtə silahlı hücuma məruz qalıb. ANS PRESS-in məlumatına görə, hücum nəticəsində 4 nəfər ölüb, 3 nəfər isə müxtəlif dərəcəli xəsarət alıb.



Bildirilir ki, yerli vaxtla saat 11.05-də bir nəfər avtomatla donanma Rezerv mərkəzinə doğru atəş açmağa başlayıb. Bundan sonra mərkəzin qapısında onlarla güllə izi qalıb. Hadisə şahidlərinin verdiyi ifadəyə görə, hücumu törədən şəxs gümüşü rəngli idman avtomobili ilə binanın qarşısındakı “Amnicole” magistral yolundan keçərkən atəş açmağa başlayıb. Hücumun baş verməsindən dərhal sonra hadisə yerinə çox sayda polis və təcili yardım briqadaları cəlb olunub və ətrafda təhlükəsizlik tədbirləri gücləndirilib. ABŞ hərbi donanmasına aid sosial şəbəkə səhifəsində hücumun hər tərəfli araşdırıldığı qeyd edilib.



Federal Təhqiqatlar Bürosu (FBI) hücumu törədən şəxsin şəxsiyyətini açıqlayıb. Bildirilib ki, Tennessi əyalətində iki hərbi nöqtəyə atəş açaraq 4 nəfərin ölümünə, 3 nəfərin isə yaralanmasına səbəb olan şəxs Məhəmməd Yusif Əbdüləzizdir. Onun bu hadisələri tək başına törətdiyi qeyd edilib.



Rəsmilər hadisəni törədən şəxsin hərbi səfərbərlik ofisinin qarşısına gedərək avtomobildən düşmədən atəş açdığını, içəridə olanların arxaya qaçması səbəbindən burda insan tələfatı olmadığını bildirib. Həmçinin həmin şəxs dəniz piyadalarının olduğu donanma rezerv mərkəzinə gedərək atəş açıb və 4 əsgəri öldürüb. Davam edən atışma zamanı hücumu törədən şəxs özü də öldürülüb.