Rusiyada azərbaycanlılar həmvətənlərindən 2 milyon oğurladılar

Mübariz Məmmədovun həbs məsələsinə baxılır.

Peterburqda öz həmvətəninə qarşı soyğunçuluq etməkdə şübhəli bilinən Azərbaycandan olan Mübariz Məmmədov saxlanılıb. O, cinayəti 2008-ci ilin payızında törədib.

Oxu.Az Rusiya KİV-nə istinadla xəbər verir ki, faktla bağlı cinayət işi açılıb.

Cinayət işi üzrə materiallara əsasən, 2008-ci ilin oktyabr-noyabrında Mübariz Məmmədov digər şəxslərlə Sofiya tərəvəz bazasında azərbaycanlılara hücum edərək soyğunçuluq edib. Onlar həmvətənlərindən birinə məxsus 2 milyon manat oğurlayıblar.

Hazırda Mübariz Məmmədovun həbs məsələsinə baxılır. İstintaq orqanlarından bildirilib ki, Məmmədovla əlbir olan şəxslər Elvin Əhmədov və Novruz Məmmədov olublar. Onlar iyulun ortalarında Sofiya tərəvəz bazasında həmvətəni olan sahibkardan pul tələb etdiklərinə görə saxlanılıblar. Hər iki cinayət işi birləşdiriləcək.