Azərbaycandan Rusiyaya qanunsuz yüklərin daşındığı aşkarlanıb

Vnukovo hava limanının gömrük hissə müdiri Vyaçeslav Laçkix 2 aylığına həbs edilib. O, Azərbaycan və Türkiyədən gətirilən yüklərin Rusiyaya qanunsuz buraxılmasında ittiham olunur.

ANS PRESS-in Rusiya mətbuatına istinadən verdiyi məlumata görə, Moskvanın Meşanskiy rayon məhkəməsi iyul ayın 4-nə kimi Vnukova hava limanının gömrük hissə müdirini həbs edib. Vyaçeslav Laçkixin vəzifə səlahiyətlərini aşmaqda ittiham olunduğu deyilib.


İstintaqın gəldiyi nəticəyə görə, Azərbaycan və Türkiyə vətəndaşları gömrük işçiləri ilə əlbir şəkildə qanunsuz yük daşımalarıyla məşğul olub. Onlar əl işləri adıyla müxtəlif kommersiya məmulatlarını Rusiya ərazisinə keçirməyə müvəffəq olublar. İstintaq bu pozuntuların 2 - 5 il arasında baş verdiyini müəyyən edib. Bu vaxt ərzində 30-dan artıq məmulatın daşındığı qeyd olunub.

Martda 16 nəfərdən ibarət qrup şübhəli bilinərək həbs olunub. Dəstə üzvlərinin dediyinə görə, onların hava limanının gömrük işçiləriylə əvvəldən razılıqları olub.