Rusiyada seçkiyə mane olan Azərbaycan vətəndaşı saxlanılıb

Rusiyada axtarışda olan Azərbaycan vətəndaşı saxlanılıb. ANS PRESS-in məlumatına görə, əməliyyat Dağıstan Respublikası ərazisində həyata keçirilib.

Daxili işlər orqanlarının əməkdaşları Tarumovski rayonunda Avadan kənd sakini 64 yaşlı Azərbaycan vətəndaşının avtomobilini saxlayıb.

Polis yoxlamaları zamanı məlum olub ki, saxlanılan şəxs beynəlxalq axtarışdadır. Saxlanılan şəxsə Azərbaycan Cinayət Məcələsinin 159-cu maddəsi ilə (Seçki (referendumda iştirak) hüquqlarının həyata keçirilməsinə mane olma) cinayət işi açılıb. Azərbaycan vətəndaşı polis bölməsinə aparılıb.

Bundan əvvəl Rusiyanın Perm vilayətində federal axtarışda olan azərbaycanlı saxlanılıb. Rusiya Daxili İşlər Nazirliyinin Perm vilayəti üzrə idarəsinin saytına istinadən verdiyi məlumata görə, Perm-Yekaterinburq avtomagistralında nəqliyyat müfəttişləri sənədləri yoxlamaq üçün "VAZ" markalı avtomobili saxlayıblar.

Avtomobilin sürücüsü 36 yaşlı azərbaycanlının sənədlərinə baxarkən onların saxta olduğu ortaya çıxıb. Polis bölməsinə aparılan şəxsin Çelyabinsk vilayətində federal axtarışda olduğu məlum olub. Həmin şəxs Çelyabinsk polisinə təhvil verilib.