Azərbaycanlı menecerlər Almaniyada – FOTO

Azərbaycanın qabaqcıl şirkətlərini təmsil edən bir qrup menecer Almaniyada ixtisasartırma kurslarında iştirak edib.

AzNews.info xəbər verir ki, "Azərbaycanın biznes ictimaiyyətində menecerlərin ixtisasının artırılması üzrə Almaniya-Azərbaycan birgə Proqramı" çərçivəsində sahibkarların və menecerlərin 2017-ci ildə Almaniyada "İqtisadi kooperasiya" üzrə 1 ay müddətində ixtisasartırma kursu təşkil olunub.
Proqramın məqsədi Azərbaycandan olan şirkət nümayəndələrinin Almaniyada ixtisasartırma kursu keçməsinə, onların beynəlxalq təcrübəyə yiyələnməsinə, alman şirkətləri ilə birbaşa iqtisadi əlaqələrinin qurulmasına, peşəkar və mədəni dünyagörüşünün genişlənməsinə şərait yaratmaqdır.

Pasha Construction, Azersun, AGAT-R, Caspian Shipping, Veysəloğlu, Engin, Formag, Gilan FMCG, Absheron Hotel Group, SOCAR və digər qabaqcıl şirkətləri təmsil edən 20 menecer 1 ay boyunca Biznesin idarə olunması, İnsan Resursları, Maliyyə, Layihələrin idarə olunması, Mədəniyyətlərarası biznes və sairə təlimlər keçmiş, eyni zamanda öz profillərinə uyğun 70-dən çox qabaqcıl Almaniya şirkətləri ilə danışıqlar aparmışlar.

Təlimlərdə iştirak edən Orxan Səfərlinin verdiyi məlumata əsasən, proqram dövrünə təsadüf edən 28 may Respublika günündə Azərbaycan gecəsi keçirilmiş, ölkənin mədəni-iqtisadi durumu barədə almanlara məlumat verilmiş, Azərbaycan turizmi barədə sənədli film təqdim olunmuş və milli təamlardan ibarət Azərbaycan süfrəsi açılmışdır.

Almaniya İqtisadiyyat və Energetika Nazirliyinin dəstəyi keçirilmiş kursda ölkəmizi təmsil edən menecerlər yüksək nəticələri ilə, eyniadlı proqramda iştirak edən digər ölkə təmsilçilərini geridə qoymuşlar. Sonda hər bir iştirakçı Almaniya Beynəlxalq Əməkdaşlıq Cəmiyyətinin və İHK Akademiyasının diplom və sertifikatları ilə təltif olunublar.