Malta hakimiyyəti “homoseksualizmin müalicəsi”ni qadağan etdi

Malta Avropada insanın homoseksual orientasiyasının geteroseksual orientasiyaya dəyişdirilməsi metodikası – reparativ terapiyan rəsmən qadağan edən ilk ölkə oldu.

Oxu.Az BBC-yə istinadən xəbər verir ki, bu praktikanın qadağan edilməsinə dair qərar Malta qanunvericiləri tərəfindən yekdilliklə qəbul edilib.

Sənədə müvafiq olaraq insanın seksual orientasiyasının dəyişdirilməsi, sıxışdırılması və məhv edilməsinə görə, 10 min avro məbləğində cərimə və ya bir ilə qədər həbs cəzası nəzərdə tutulub.

Qanunda həmçinin qeyd edilir ki, heç bir seksual orientasiya və ya gender mənsubiyyəti çatışmazlıq və ya xəstəlik kimi nəzərdən keçirilə bilməz.

Reparativ terapiya homoseksuallığın psixi pozuntu olduğu ideyasına əsaslanır.

Bu gün reparativ terapiya Avropadan çox ABŞ-da tətbiq edilir, bununla yanaşı, ABŞ-ın bəzi ştatlarında (Kaliforniya və İllinoys) qadağan edilib.