Azərbaycan futbolu üçün görkəmli tarix

Bu həftəni Azərbaycan futbolu üçün görkəmli adlandırmaq olar. Tarixdə ilk dəfə olaraq ölkənin iki klubu Avropa Liqasının qrup mərhələsinə vəsiqə qazanıb.

Özü də hər ikisi bu nailiyyətə layiq olan oyun səviyyəsi nümayiş etdirərək...

Bakıda “ayı ovu”

Ölkə çempionu “Qarabağ” qrup mərhələsinə vəsiqəni zahirən böyük əziyyət çəkmədən əldə etdi. “Young Boys” üzərindəki Berndəki qələbədən sonra ağdamlıların ümumi nailiyyət əldə edəcəyinə əmin olmaq olardı.

Düzdür, oyun ərəfəsində isveçrəlilər qələbə uğrunda şəhərlərinin adına layiq olaraq, ayılar kimi (Bern almanca "ayı" deməkdir) var gücləri ilə döyüşəcəklərini vəd etsələr də onların ümidləri artıq 3-cü dəqiqədə puç oldu.

Hakim qonaqların qapısına penalti təyin edib, fon Bergenə qırmızı vərəqə göstərəndə onun həmin vərəqəni tutan əli ucaldıqca qonaqların da ümidləri buxarlanaraq göylərə çıxdı.

“Young Boys”lular bu cəzanın həddindən artıq sərt olduğunu desələr də “Berner Oberlaender” qəzeti fon Bergenin qaydanı pozanda qapı qarşısında son müdafiəçi olduğunu vurğulayaraq cəzanın qaydalara tam müvafiq olduğunu qeyd edir.

"Penaltini qola çevirəndən sonra “Qarabağ” rəqibini topsuz qoydu və istədiyi zaman oyunun sürətini ağıllıcasına dəyişdirərək qonaqları sanki oyuncağa çevirdi” - deyə Bakıda oyunu izləmiş bernli jurnalist bildirir.

İsveçrə mətbuatı ağdamlıların əla oyun nümayiş etdirərək tam üstünlüyə nail olduğunu qeyd edir və bu qarşıdurmada kimin qələbəyə layiq olduğunu qəti olaraq şübhə altına qoymur.

Mən isveçrəlilərlə tamamilə razıyam. Reynaldo ikinci qolu vuranda qonaq müdafiəçinin səhvindən istifadə etsə də bu səhvə gətirən “Qarabağ”ın çoxgedişli kombinasiyası lap elə futbol dərsliklərinə salınasıdır.

Üçüncü qol vurulanda isə nəyin daha gözəl olduğunu - Almeydanın “kor-koranə” ötürməsini, ya Əfran İsmayılovun iti bucaqdan qapıçının ayaqları arasından vurduğu qol zərbəsini demək çətin olar – hər iki hərəkəti əsl futbol gözəllikləri adlandırmaq olar.

Belə ki, ağdamlıların bu oyunda Alp ayısını qara bağa salıb rahatca ovladıqlarını demək olar.

Afinada “döyüşçü ilahənin fəthi”

Azərbaycan çempionundan bu nailiyyəti gözləmək olardısa, “Qəbələ”nin bu mərhələni adlaması şübhəsiz ki, hamı üçün böyük bir sürpriz oldu.

Ümumafinalıların (“Panatinaikos” adı yunanca bu mənanı verir) çox güclü rəqib olduqlarından və “Qəbələ”də məlum hadisələr səbəbindən mənəvi durumun yaxşı olmayacağı gözlənildiyindən bu cütlükdə yunanların qalib gələcəyi demək olar ki, bütün mütəxəssislər tərəfindən proqnozlaşdırılıdı.

Amma məlum oldu ki, “Qəbələ”nin qarşılaşdığı çətinliklər komandanı toparladıb, daha da möhkəmləndirib.

Qonaqlar Afinada meydan sahiblərinə əməlli-başlı döyüş göstərdilər. Əslində hansısa Azərbaycan komandasının belə əzmkar oyun göstərməsi çox nadir və bu səbəbdən öz-özlüyündə əlamətdar bir hadisədir.

Hər iki qolun müəllifi Dodo isə Azərbaycan futbolu üçün əməlli-başlı bir raritetdir. Lap elə onun adaşı olan, Mavriki adasında yaşamış və XVII əsrdə insanlar tərəfindən nəsli kəsilmiş Dodo quşu kimi.

Cərimə meydançasında düzgün mövqe tutan bu hücumçu qapıya iki zərbə endirərək ikisini də qollara çevirə bildi.

Düzdür, bu qollarda ötürmələri verən Rikardinyo və xüsusən Qayın zəhmətini də qeyd etməmək mümkün deyil.

Yunanıstanın “Tovima” qəzeti oyun getdikcə qonaqların özünə inamının artdığını qeyd edir.

Mən deyərdim ki, bu özünəinam o dərəcəyə çatdı ki, qəbələlilərə qədim döyüşçü ilahənin (qədim mifologiyaya görə, Afina döyüşən və hətta titanları məğlub edən yeganə ilahə idi) şəhərində onun davamçılarını üstələyərək müsbət nəticə əldə etməyə imkan verdi.

Yunan qəzetləri bu məğlubiyyəti biabırçı adlandırsa da, “Panatinaikos” azarkeşləri oyun bitən kimi bu biabırçılığa görə meydana cumub öz oyunçularına hücum etsələr də, qeyd etmək lazımdır ki, iki oyunluq qarşıdurmada afinalılar heç də “Qəbələ”dən yaxşı oyun göstərmədilər.

“Qəbələ” üçün “yunan macərası”nın davamı

Maraqlısı odur ki, Avropa liqasının qrup mərhələsində “Qəbələ” daha bir yunan klubu ilə qarşılaşacaq.

Düzdür, Salonikinin PAOK komandası “Panatinaikos” qədər möhtəşəm sayılmır, amma bu mövsüm Avropa Liqasında PAOK çox uğurlu çıxış edir.

Elə Xorvatiyanın “Lokomotiva” və Danimarkanın “Brondbü” klubları üzərində müvafiq olaraq 6:0 və 5:0 hesabı ilə qələbələr öz-özlüyündə bunun göstəricisi ola bilər.

Amma salonikililər güman ki, “Qəbələ”nin qrupdakı rəqiblərindən ən zəifidir. Belə ki, Rusiyanın “Krasnodar” və xüsusən də Almaniyanın “Borussiya” (Dortmund) klublarının səviyyəsi daha yüksəkdir.

“Krasnodar” ötən mövsümdə Rusiya çempionatında bir çox böyük klubları qabaqlayaraq 3-cü yeri tutmuşdu. Avropa Liqasında isə “Everton” və “Lill” kimi klublarla keçirdiyi oyunların heç birində məğlub olmamışdı.

Rusiya jurnalistlərinin fikrincə, krasnodarlılar ölkə çempionatında ən maraqlı hücum oyununu göstərən komandadır.

Bununla yanaşı heyətində Polşa (Yedjeyçik), İsveç (Qrankvist) və İslandiya (Siqurdsson) millilərinin müdafiəçiləri və Ukrayna millisinə cəlb olunan qapıçı Dikanın olduğu bu klub öz qapısını qorumaqda da çox yaxşı bacarıqlar nümayiş etdirir.

Qrupun danılmaz favoriti isə “Borussiya”dır. Səkkizqat Almaniya çempionu, Çempionlar Liqasının qalibi, cəmi iki il öncə bu yarışın finalında oynayan, nəhayət, UEFA-nın əmsalına görə hazırda Avropanın 12-ci ən güclü klubu olan dortmundlular möhtəşəm bir qüvvədir.

Elə onu demək kifayətdir ki, “Borussiya” bu mövsümdə keçirdiyi oyunların yeddisində də qalib gələrək bu görüşlərdə 27 (!) qol vurub.

“Qarabağ”ın adlı-sanlı qrupu

Buna baxmayaraq “Qarabağ”ın düşdüyü qrupu “Qəbələ”ninkindən daha çətin hesab etmək olar.

“Tottenhem”, “Monako” və “Anderlext” - bu klubların hər birinin Avropa futbolunda özünəməxsus və hörmətli bir yeri var.

“Tottenhem” İngiltərənin əfsanəvi klublarından biridir. Üç dəfə Avropa kuboklarının qalibi olmuş bu klub son illər İngiltərə premyer-liqasının möhtəşəmləri ilə tam bərabər mübarizə aparmağa bacarmasa da (büdcə imkan vermir), turnir cədvəlinin yuxarı trimestrində yer almağı bacarır.

Heyətində İngiltərə, Fransa, Argentina, Hollandiya, Belçika, Danimarka, Uels kimi millilərin aparıcı oyunçuları, üstəgəl Adebayor kimi möhtəşəm hücumçusu olan bu klubun “Qarabağ” və ümumilikdə hər bir Azərbaycan komandası üçün ən xoşagəlməz xüsusiyyəti çox sürətli oyun nümayiş etdirməsidir.

Amma “Qarabağ” topu saxlamaqda demək olar ki, möhtəşəmdir və bu yolla londonluların sürət üstünlüyünü heçə salmaq mümkündür.

“Monako”nun da xüsusi təqdimata ehtiyacı yoxdur. Cəmi dörd ay bundan əvvəl moneqasklar Çempionlar Liqasının 1/4 finalında gərgin mübarizədə “Yuventus”a məğlub olmuşdular ki, bu da səkkizqat Fransa çempionlarının səviyyəsinin bariz göstəricisidir.

Amma qeyd etmək lazımdır ki, “Monako”nun nümayiş etdirdiyi akademik oyun üslubu “Qarabağ” üçün çox münasibdir və ağdamlılar bu klubla uğurlu mübarizə apara bilər.

Üç dəfə Avropa kuboklarının qalibi və 33 dəfə Belçika çempionu olmuş “Anderlext”i tanımayan çətin ki, olsun.

Qrupdakı digər rəqiblərə nisbətən daha zəif hesab edilə bilən brüssellilər öz-özlüyündə çox böyük bir qüvvədir ki, ilk baxışdan “Qarabağ”ın bu qrupda heç bir şansa malik olmamasını düşünmək olar.

Amma biz hamımız bilirik ki, ilk baxış çox zaman aldadıcı olur... (BBC).