Hacıbaba Hüseynovun doğum günüdür – VİDEO

Bu gün tanınmış xanəndə Hacıbaba Hüseynovun anadan olmasından 98 il ötür.

Oxu.Az xəbər verir ki, H.Hüseynov 15 mart 1919-cu ildə Bakı şəhərində anadan olub.

Erkən yaşlarından güclü hafizəsi sayəsində eşitdiyi dini-musiqi nümunələrini, muğamları dərindən mənimsəmiş, əruz vəzninin qayda-qanunlarını öyrənərək qəzəllər yazmağa, tədricən muğam və təsniflər oxumağa başlamışdır. Onun səs diapozonu o qədər geniş olmasa da, öz tembrinə görə təsirli və məlahətli idi.

Uzun illər Azərbaycan Dövlət Musiqi Məktəbində muğamatdan dərs demiş, xanəndələr yetişdirmişdir. Onun yaratdığı çoxsaylı təsniflər musiqi irsinə daxil olmuş və muğam ifaçılığında geniş yayılmışdır.

Qeyd edək ki, Hacıbaba Hüseynov mərhum Xalq artisti Sara Qədimovanın kürəkəni olub.

H.Hüseynov 24 oktyabr 1993-cü ildə vəfat edib.