Almaniyanın Hannover şəhərində 50 min insan təxliyə edilib

Almaniyanın Hannover şəhərində İkinci Dünya müharibəsindən qalan 5 bomba partladılacaq.

AzNews.info-nun Trend-ə istinadən verdiyi məlumata görə, bu səbəbdən 50 min şəhər sakini təxliyə edilib.

Bombaların partladılması əməliyyatı bazar günü nahardan sonra başlayacaq və axşama qədər davam edəcək.

“Bu, Hannover şəhərində İkinci Dünya müharibəsi vaxtından ən böyük əməliyyatdır”, - yanğından mühafizə xidmətinin nümayəndəsi Mixael Xints deyib.

Qeyd edək ki, 2016-cı ilin dekabr ayında belə bir əməliyyat Almaniyanın Auqsburq şəhərində baş tutmuşdu və bu səbəbdən 54 min insan təxliyə edilmişdi.