Nigeriyada “Mançester Yunayted” klubunun 30 azarkeşi ölüb – VİDEO

Mançester Yunayted klubu həlak olanların yaxınlarına başsağlığı verib.

Nigeriyada yüksək gərginlikli elektrik naqili “Mançester Yunayted” klubu azarkeşlərinin Avropa Liqasının matçını izlədiyi futbol mərkəzinin damına düşməsi nəticəsində 30 nəfər ölüb.

AzNews.info Report-a istinadən xəbər verir ki, bu barədə “Mirror” qəzeti məlumat yayıb.

Xəbərdə bildirilir ki, hadisə Kalabar şəhərində baş verib. Şahidlər qeyd ediblər ki, onlar transformatorda alov görüblər. Bundan sonra yüksək gərginlikli naqil klubun damına düşüb.

Nəticədə 28 nəfər hadisə yerindəcə dünyasını dəyişib. Daha 2 nəfər isə xəstəxanada ölüb.

Yerli hakimiyyət orqanları hadisəni dəhşətli faciə adlandırıblar və yüksək gərginlikli xəttin altında klubun inşa edilməsinin qanunsuz olduğunu bildiriblər.

“Mançester Yunayted” “Twitter”dəki səhifəsində həlak olanların yaxınlarına başsağlığı verib, yaralılara şəfa diləyib.