Avropa oyunlarında fərqlənən DYP işçilərinə mükafat – FOTO

I Avropa Oyunlarında fərqlənən yol polisləri mükafatlandırıldı. ANS PRESS-in məlumatına görə, yol hərəkətinin təhlükəsizliyi ilə bağlı nümunəvi xidmətlər göstərən Bakı şəhər Dövlət Yol Polisinin 19 əməkdaşı, 1 tağımı və Bakının rayon Dövlət Yol Polisi şöbələrinin şöbənin 11 işçisi təltif edilib.
Yol polislərinə diplomlar və hədiyyələr verilib.

Mükafatlandırma Bakı Şəhər Dövlət Yol Polisi İdarəsi və "Jurnalistika və İnkişaf Mərkəzi" İctimai Birliyi tərəfindən təşkil edilib.

"Jurnalistika və İnkişaf Mərkəzi" İctimai Birliyinin sədri Elməddin Muradlı bildirib ki, “Yol polisi sürücü münsibətlərinə” həsr edilən layihənin məqsədi yol hərəkəti mədəniyyətinin yüksəldilməsi, yol hərəkəti iştirakçıları arasında nizam-intizamin gücləndirilmək olub. Layihə 4 ay müddətində davam edib.

Onun sözlərinə görə, DYP əməkdaşları Avropa OYunları ərəfəsində və oyunlar zamanı müstəsna xidmət göstəriblər.
"Bəlkə biz heç o cür ağır iş şəraitinə dözə bilməzdik. Amma yol polisi bunun öhdəsindən layiqli şəkildə gəldi".

Xatırladaq ki, bir neçə gün Daxili İşlər Nazirliyində (DİN) I Avropa Oyunları zamanı ictimai asayişin qorunmasında qarşıya qoyulan tapşırıqların və təhlükəsizliyin təmin edilməsi üzrə vəzifələrin yerinə yetirilməsində fərqlənmiş bir qrup əməkdaşa mükafatların təqdim olunmasına həsr olunmuş təntənəli mərasim keçirilib.

Dövlət başçısının tapşırığı ilə I Avropa Oyunları zamanı xidməti vəzifələrini nümunəvi yerinə yetirdiklərinə, ictimai qaydanın və təhlükəsizliyin təminində yüksək peşəkarlıq göstərdiklərinə görə daxili işlər nazirinin müvafiq əmrləri ilə 2145 əməkdaş və hərbi qulluqçunun mükafatlandırıldığı, eyni zamanda, ərazi polis orqanlarından nazirliyin rəhbərliyinədək olan səviyyədə isə ümumilikdə təxminən 7 min nəfər barəsində müxtəlif həvəsləndirmə tədbirlərinin tətbiq olunduğu diqqətə çatdırılıb.