““Azəryolservis” çörəyimizi əlimizdən alıb”

Ucar sakini hüquqlarının pozulduğunu iddia edir, qarşı tərəf isə hüquq-mühafizə orqanlarına müraciət etməyi məsləhət görür
İyun ayının 4-də Bizimyol.info-nun elektron ünvanına Ucar rayonu Gəraybəyli kənd sakini Gültəkin Cəbrayılova tərəfindən şikayət məktubu daxil olub. Şikayətçinin sözlərinə görə, "Azəryolservis" ASC onların ailəsinə məxsus olan obyekti bağlayıb: ""Azəryolservis" 1-ildir ki, sahibkarlıq fəaliyyəti ilə məşğul olan obyektimizi bağlayıb, bizi işsiz qoyub, mülkiyyətimizi əlimizdən almaq istəyir.

Bakı-Qazax magistral yolunun asfalt örtüyünün yenilənməsi ilə əlaqədar Ucar rayon ərazisindən keçən hissəsində aparılan işlərə görə qanuni sənədlərlə mülkiyyətimiz olan yük avtomaşınlarının təmiri sexinin fəaliyyəti qanunsuz olaraq dayandırılıb. Həmin sexə gedən yol bağlanıb deyə bir ildir işləmir. 1995-ci il tarixdə mərhum həyat yoldaşım Məmmədəli Cəbrayılov həmin torpaq sahəsini alıb, sənədlə qanuni qaydada sex tikdirdi. Həyat yoldaşım və oğlanlarım orada yük avtomobillərinin təmiri ilə məşğul olurdular. Buna görə vaxtlı-vaxtında dövlətə vergi ödəyirdik".

G.Cəbrayılovanın sözlərinə görə, yoldaşı 2011-ci ildə böyrək çatışmazlığından vəfat edib: "Həyat yoldaşım xəstə olan vaxt avtomobil təmiri sexini satıb onun müalicəsinə xərcləmək istəyəndə, xəstəliyinin sağalmayacağını bilib, buna icazə vermədi. Dedi ki, bu sex 8 nəfərlik ailəmin daimi iş, çörək yeridir. İndi isə "Azəryolservis" ASC haqqı-halal, qanuni mülkiyyətimizi əlimizdən alır. Həmin sexə gedən yolu tikintiyə görə 1 ildir bağlayıb, bizim ailəni işsiz, çörəksiz qoyublar. Biz buna görə Ucar Rayon İcra Hakimiyyəti başçısının qəbulunda olub şikayət etdik. İcra başçısının tapşırığından sonra "Azəryolservis" ASC-nin Azər adlı məsul vəzifəli əməkdaşı gəlib bizə 17 000 manat kompensasiya təklif etdi. Bildirdi ki, tikinti başa çatdıqdan sonra işinizi davam etdirib, sexinizin fəaliyyətini bərpa edərsiniz. 31 may 2015-ci il tarixdə isə "Azəryolservis" ASC-nin əməkdaşı gəlib bizə bildirdi ki, "müdiriyyət dedi ki, onlara heç bir kompensasiya düşmür, bu yolu və körpünü dövlət çəkir, yol çəkiləndən və körpü tikiləndən sonra sexlərini açıb işləyərlər"".

Şikayətçi bildirir ki, magistral yolda tikilən körpü sexin yaxınlığından keçdiyi üçün, orada bundan sonra işləmək heç cür mümkün olmayacaq. Çünki körpünün yamacı onların sexinin 4 metrliyindən keçir: "2 metr hündürlükdədir, belə olanda sexə nəinki yük avtomobilləri, heç kiçik maşınlar da gələ bilməyəcək. 2 metr hündürlükdə olan körpünün yamacında yerləşən sexdə işləmək özü çox təhlükəlidir. Hər an nəqliyyat hadisəsi baş verə bilər. Buna görə kiminsə həyatını sığortalamaq mümkün deyil. Bunun isə bir əlacı var. Düzgün kompensasiyamızı versinlər ki, seximizi həm bir neçə metr arxaya çəkib, həm də yamacla sexin yolunun arasında olan hündürlüyü eyniləşdirib əvvəlki kimi sahibkarlıq fəaliyyətimizi bərpa edə bilək. "Azəryolservis" ASC isə bizə hədə-qorxu gəlir, mülkiyyətimizi əlimizdən tamam almaq istəyir. Baxmayaraq ki, yol tikintisi zamanı vətəndaşlara dəymiş zərərin əvəzinin tam ödənilməsinə cənab Prezident tapşırıqlar verib. Ancaq bunlar isə vətəndaşları aldadıb pullarını mənimsəyib, çörəksiz qoymaq istəyirlər".

G.Cəbrayılova deyir ki, 8 nəfərlik ailənin yeganə dolanışıq yeri bu sexdir və onlar hazırda işsiz qalıblar: "İndi qanunları tanımayan vəzifəli şəxslərin saxtakarlığına görə işsiz, çörəksiz qalmışıq. Bir ailə başçısı, ana kimi Prezident cənab İlham Əliyevdən və Mehriban xanım Əliyevadan kömək istəyirəm. Sizdən xahiş edirəm ki, bizim mülkiyyətimizi əlimizdən almaq istəyən, bizim ailəni işsiz, çörəksiz qoyan və qanuni kompensasiyamızı mənimsəyən "Azəryolservis" ASC-nin məsul vəzifəli şəxsləri barədə tədbir görəsiniz. Onların milyonları var, toxdurlar. Biz isə acından ölmək təhlükəsi ilə üz-üzə qalmışıq. Xahiş edirik, bizə kömək edin".

Hüquqşünas Əkrəm Həsənov məsələ ilə bağlı "Bizim Yol"a şərhində vətəndaşın hüquqları pozulduğunu bildirib: "Yeganə hüquqi yol məhkəmədə iddia qaldırılmasıdır. Əsas aydındır: mülkiyyət hüququ kobud şəkildə pozulub. Amma paralel olaraq Prezidentə və Ombudsmana şikayət versinlər".

"Azəryolservis" ASC-nin mətbuat xidmətindən Bizimyol.info-ya bildirildi ki, bu haqda artıq bir neçə gündür ki, müxtəlif xəbərlər gedir. Kürdəmir-Ucar, Yevlax-Tərtər avtomobil yolunun yenidən qurulması layihəsi "Azəryolservis" ASC tərəfindən həyata keçirilir: "Həmin avtomobil yolunun yenidən qurulması layihəsi çərçivəsində vətəndaş Gültəkin Cəbrayılovaya məxsus təmir sexi tikinti sahəsindən kənarda yerləşir. Yəni həmin səbəbdən vətəndaşa kompensasiyanın ödənişi nəzərdə tutulmayıb. Ancaq sözügedən təmir sexi tikinti sahəsindən kənarda yerləşməsinə baxmayaraq, Nəqliyyat Nazirliyi, "Azəryolservis" ASC tərəfindən həmin obyektə giriş-çıxış təmin olunacaq. Vətəndaş Cəbrayılova Nəqliyyat Nazirliyi və "Azəryolservis" ASC-nin əməkdaşları tərəfindən ona və ailəsinə hücum edilməsi barədə müəyyən sözlər deyib. O da həqiqəti əks etdirmir. Bir daha deyim ki, onun obyekti tikinti sahəsindən kənarda yerləşir və tikintiyə heç bir maneçiliyi yoxdur. Belə olan halda Nəqliyyat Nazirliyinin və "Azəryolservis" ASC-nin əməkdaşları niyə həmin ailəni narahat etməlidir ki? Əksinə, həmin xanım, onun ailə üzvləri ərazidə yolun tikilməsinə müxtəlif yollarla mane olmağa çalışırlar. Buna baxmayaraq, həmin vətəndaşın hər hansı bir narazılığı varsa, hüquq mühafizə orqanlarına müraciət edə bilər. Bu, vətəndaş olaraq onun haqqıdır. Tikinti başa çatdıqdan sonra isə həmin obyektə giriş çıxış təmin olunacaq".