Neftçalada üzərlərinə beton plitə düşən fəhlələrdən biri ölüb, digəri isə xəsarət alıb

Bu gün axşam saatlarında Neftçala şəhərindəki Y.Hacıyev küçəsindəki həyətlərin birində bədbəxt hadisə baş verib.

Virtualaz.org-un Şirvan bürosunun məlumatına görə, qaldırıcı kran beton plitələri qaldırarkən tros qırıldığından plitə 2 nəfərin üzərinə düşüb.

Hadisə nəticəsində 57 yaşlı Neftçala rayon Qoltuq kənd sakini İlham Rza oğlu Rzayev aldığı xəsarətlərdən hadisə yerində dünyasını dəyişib. Onunla birgə işləyən 35 yaşlı həmkənslisi Elşən Ölməz oğlu Lalayev isə müxtəlif dərəcəli bədən xəsarətləri ilə Neftçala Rayon Mərkəzi Xəstəxanasına yerləşdirilib.

Qeyd edək ki, üzərlərinə beton plitə düşən hər iki şəxs Neftçala Suvarma Sistemləri İdarəsinin fəhlələridir.

Faktla bağlı araşdırmalara başlanılıb.