İnsan alverinin qurbanı olan 81 nəfərə yardım edildi

İnsan Alveri Qurbanlarına Yardım Mərkəzində insan alveri qurbanı olan 58 nəfərə yardım göstərilib.

Bu barədə virtualaz.org saytına Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsinin rəhbəri Elman Babayev məlumat verib.

E.Babayev deyib ki, potensial insan alveri qurbanı olan 23 nəfər də yardım alıb. İnsan alveri qurbanı olan 16 nəfər işlə təmin edilib, 6 nəfər peşə hazırlığına göndərilib. 12 qurban isə sığınacaqla təmin edilib.

Qeyd edək ki, “Azərbaycan Respublikasında insan alverinə qarşı mübarizəyə dair 2014-2018-ci illər üçün Milli Fəaliyyət Planı”na uyğun olaraq Biləsuvar, Masallı, Cəbrayıl, Astara, Siyəzən, Şabran, Qusar, Oğuz, Qax, Zaqatala, Balakən və digər rayonlarda gənclərin iştirakı ilə tədbirlər keçirilib.