Əməkdar artist Azər Mirzəyevin anım günüdür

Bu gün Əməkdar artist Azər Mirzəyevin vəfatından 3 il ötür.

Oxu.Az xəbər verir ki, Azər Əlibala oğlu Mirzəyev 1952-ci il may ayının 12-də, Zərdab rayonunda, müəllim ailəsində anadan olub. Atasının işi ilə əlaqədar olaraq sonradan ailəsi ilə Sabirabad rayonuna köçən A.Mirzəyev orta məktəbi burada başa vurub və 1968-ci ildə SSRİ Xalq artisti Ədil İsgəndərovun rəhbərliyi altında “Azərbaycanfilm”in nəzdində fəaliyyət göstərən kino aktyorluğu studiyasına qəbul olunub.

1970-ci ildə buranı bitirəndən sonra sənədlərini Azərbaycan Dövlət Mədəniyyət və İncəsənət Universitetinin Dram və kino aktyorluğu fakültəsinə verib və qəbul olunub.

1974-cü ildə ali məktəbi bitirəndən sonra təyinatla Azərbaycan Dövlət Gənc Tamaşaçılar Teatrına göndərilən Azər Mirzəyev o gündən ömrünün son günlərinədək həmin teatrın səhnəsində yaddaqalan obrazlar yaradıb.

Aktyor 19 iyul 2014-cü ildə ürək tutmasından dünyasını dəyişib.