Azərbaycana qar yağdı, yol bağlandı – VİDEO

Bu yoldan istifadə etməli olan sürücülərə diqqətli və ehtiyyatlı olmaq tövsiyə edilir.

Hava şəraitinin kəskin dəyişməsi Şamaxını qarın əsirinə çevirib. Bu ərazidən keçən magistral yollar buz bağlayıb, bir neçə kəndə gediş-gəlişdə problemlər yaşanıb.

Oxu.Az ARB TV-yə istinadən xəbər verir ki, yolların qar-buz olması səbəbi ilə xeyli maşın yolda qalıb. Əsas magistrallarda axşam saatlarında vəziyyətin təhlükəli hal alacağı ehtimal olunur. Odur ki, bu yoldan istifadə etməli olan sürücülərə diqqətli və ehtiyyatlı olmaq tövsiyə edilir.

Bakı-Şamaxı-İsmayıllı magistralı, Şamaxı-Ağsu dolayları qar və şaxtalı hava səbəbindən buz bağlayıb. Magistrallarda səhər saatlarında yaranan buzlaşma yol idarəsinin köməkliyi ilə aradan qaldırılıb. Yolda avtomobillərin hərəkətində hələlik hər hansı bir problem yaşanmayıb. Axşam saatlarında şaxtalı hava səbəbindən yollar buz bağlayacaq. DYP idarəsi isə təhlükəli vəziyyətlə əlaqədar sürücülərə xəbərdarlıq edib. Qarın əsas çətinlik yaratdığı Şamaxı-Pirqulu yolu isə sürücülər üçün keçilməz olub. Sözügedən yolda səhər saatlarından buzlaşma müşahidə olunub. Yola qum duz qarışığı tökülsə də təkrar şaxtalı hava yolda buzlaşmaya səbəb olub.

Hazırda Qaleybuğurd, Dəmirçi, Zarat, Pirbəhli və Qızmeydan kəndlərinə gedən yolda buzlaşma səbəbindən hərəkətə qısa fasilələrlə məhdudiyyət qoyulub. Nağarxana kəndindən bəzi sürücülər geri qayıtmaq məcburiyyətində qalıb. Dağlıq kəndlərə 30-40 santimetr qar yağıb. Kənd yollarının bağlanmaması üçün yola qum-duz qarışığı səpilir.