Sumqayıtda “Karvan”ı yandıran şəxs 3 ildən sonra həbs olundu

Sumqayıt Apellyasiya Məhkəməsinin 20.05.2016-cı tarixli qərarı ilə 3 il əvvəl - 2013-cü ilin oktyabrın 19-da "Karvan” Ticarət Mərkəzində səhlənkarlığı ucbatından yanğına səbəb olmuş Sumqayıt sakini Bayramov İsməli Həmid oğlu həbs olunub. O, məhkəmə zalında qandallanaraq barəsində beş il altı ay müddətinə həbs qərarı verilib.

Bu barədə vəkil Emil Bədəlov məlumat verib. Belə ki, Sumqayıt şəhər məhkəməsinin 27.04.2015-ci il tarixli qərarından zərərçəkmiş şəxslər Ş.Əsgərov və F.Quliyev tərəfindən və prokurorluq tərəfindən verilmiş apellyasiya protesti Sumqayıt Apellyasiya Məhkəməsi tərəfindən təmin edilib. Bu qərara qədər İsməli Bayramov azadlıqda olmuş və əvvəlki işində fəaliyyətini davam etdirib.

Qeyd edək ki, "Karvan” ticarət mərkəzinin sahibi Sumqayıt şəhərinin ən iri sahibkarlarından olan Ağamirzə Əhədovdur. Xatırladaq ki, 2013-cü ilin oktyabrın 19-da Sumqayıt şəhərinin ən böyük ticarət mərkəzi olan "Karvan"”a güclü yanğın olub. Hadisə nəticəsində bir nəfər ölüb, beş nəfər isə yaralanıb.