“Beşiktaş” futbolçuları azərbaycanlıya dəstək oldular

İstanbulda ona qorxulu diaqnoz qoydular.

“Beşiktaş” futbolçuları leykemiyaya tutulan İstanbul Texniki Universitetinin tələbəsi - azərbaycanlı İbrahim Fərhadlını dəstəkləyiblər.

Oxu.Az türk KİV-nə istinadən xəbər verir ki, yanvar ayında 22 yaşlı oğlanın burnundan qan gəlib, bundan sonra xəstəxanaya yatırılan İbrahimə qorxulu diaqnoz qoyublar.

İbrahim Türkiyə vətəndaşı olmadığı və sosial sığortaya sahib olmadığı üçün İstanbulun özəl klinikalarının birində müalicə alır, bu isə böyük maliyyə vəsaiti tələb edir.

Nəticədə İbrahim Fərhadlıya yardım kampaniyasına start verilib. Kampaniyaya həmvətənimiz hələ Bakıda olarkən azarkeşlik etdiyi İstanbulun “Beşiktaş” klubunun futbolçuları da qoşulub.

Mario Qomez, Olcay Şaan, Gökan Töre, Günay Güvendik, Cenk Tosun və Tolqa Zengin İbrahima dəstək məktubu göndəriblər. Onlar, həmçinin İbrahimə imzaladıqları klub köynəyini də yollayıblar.

Azərbaycanlını müğənni Ayko Çepkin də dəstəkləyib.