Tovuzda qədim yaşayış məskəni aşkarlanıb – FOTO

Tovuzda dörd qədim yaşayış məskəni və məbədlər kompleksi tapılıb. Rayonun ucqar dağ kəndi Çobansıxnaqda aşkarlanan qədim məkanın Qafqaz Albaniyasına məxsus olduğu bildirilir.

AzNews.info xəbər verir ki, yerli tədqiqatçı Calaləddin Qasımov AzərTAc-a bildirib ki, uzun illər boyu axtardığı Abdal şəhərini ən hündür zirvədə aşkarlayıb. Qədim insanlara məxsus 3 hektara yaxın ərazidə iri sal daşlarla hörülmüş mühafizə divarları, onların zaman-zaman məişətdə işlətdiyi əşyalar maraq doğurur. Bir-birindən 5-7 kilometr aralıda yerləşən qədim yaşayış məskənlərini isə yüz illər öncə çəkilən araba yolları birləşdirir.

Çətin dağ şəraitində ərazini qarış-qarış gəzən C.Qasımov bura arxeoloqları dəvət edib. Elmlər Akademiyasının Arxeologiya və Etnoqrafiya İnstitutunun Tovuz arxeoloji ekspedisiyasının üzvləri ərazidə kəşfiyyat xarakterli iş apararaq Çobansıxdaqda tapılan qədim abidənin albanlara məxsus olduğunu üzə çıxarıb. Bununla yanaşı, ərazidəki qədim məbəd kompleksi də arxeoloqların diqqətini cəlb edib.