Ermənistanda yoxa çıxmış Su-25 təyyarəsi yarğanda tapıldı, pilotlar ölüb – YENİLƏNİB

Ermənistan Hərbi Hava Qüvvələrinə məxsus “Su-25” hücum təyyarəsi qəzaya uğrayıb.

Virtualaz.org yerli KİV-ə istinadən bildirir ki, bunu ölkənin Müdafiə Nazirliyi mətbuat xidmətinin katibi Artsrun Ovannisyan “Facebook” səhifəsində yazıb.

O bildirib ki, Gümrü şəhərindəki aeroportdan havaya qalxandan sonra radarlardan itən döyüş təyyarəsinin qəzaya uğraması nəticəsində iki pilot ölüb. Bunlar polkovnik-leytenant Armen Babayan və mayor Movses Manukyandır.

Təyyarənin qalıqları Ermənistanın şimal-qərbində yerləşən Şirak vilayətinin Maralik şəhəri yaxınlığındakı dağlıq ərazidən tapılıb.

* * *13:48

Ermənistan Silahlı Qüvvələrinin radarlardan yoxa çıxmış Su-25 hərbi təyyarəsi ölkənin Şirak vilayətinin Bardzraşen kəndinin yaxınlığında yarğanda tapılıb.

Virtualaz.org “Shamshyan.com” erməni nəşrinə istinadən xəbər verir ki, hərbi maşının və pilotunun başına gələnlər barədə əlavə məlumat yoxdur.

* * *12:57

Bu gün yerli vaxta saat 10:20-də Ermənistan Silahlı Qüvvələrinin Su-25 hərbi təyyarəsi ilə əlaqə itib.

Virtualaz.org “Aysor” erməni nəşrinə istinadən xəbər verir ki, təyyarə gündəlik hərbi hazırlıq planına müvafiq olaraq, təlim-məşq uçuşu həyata keçirirmiş.

Ermənistan Müdafiə Nazirliyinin məlumatına görə, təyyarə saat 10:06-da Gümrü şəhərinin hava limanından uçuş edib.