Türkiyədə təlimlər: Xüsusi təyinatlılarımız hava limanını azad etdilər - FOTO

Türkiyə, Azərbaycan, Bolqarıstan və Gürcüstanın xüsusi təyinatlıları terrorçular tərəfindən ələ keçirilmiş hava limanının azad edilməsi üçün birgə əməliyyatı məşq ediblər.

Oxu.Az Türkiyə KİV-ə istinadən xəbər verir ki, “Commando Ex 2016” hərbi təlimləri Türkiyədə Eğirdir gölü sahilində keçirilib.

Təlimləri Türkiyə quru qoşunlarının tədris və doktrina komandanı, ordu generalı Kamil Başoğlu və digər yüksək rütbəli zabitlər izləyiblər.

Ümumilikdə təlimlərə dörd ölkənin 136 hərbi qulluçusu cəlb olunub.

Ssenariyə əsasən xüsusi təyinatlılar beynəlxalq humanitar yardım əməliyyatının həyata keçirilməsi və BMT karvanlarının hərəkətini təmin edilməsi üçün terrorçuların ələ keçirdiyi aerporta hücum ediblər.

Əməliyyatın birinci mərhələsinin hədəfi hava limanının ərasizində yerləşən sahil nöqtəsini nəzarət altına almaq olub. Qayıqlarda sahilə yaxınlaşan xüsusi təyinatlılar müxtəlif nöqtələrdə terrorçuların postlarını zərərsizləşdiriblər. Bundan sonra əsas qüvvələr hava limanını azad ediblər.