Polisin silahı əlindən alındı

Amerika Birləşmiş Ştatları prezidenti Barak Obama ölkədə etnik azlıqlarla polis arasındakı gərginliyi aradan qaldırmaq məqsədilə yerli polis məntəqələrinin məhdud sayda silahla təchiz olunmasına əmr verib.

ANS PRESS-in məlumatına görə, Obama Nyu Cersi ştatında çıxışı zamanı qeyd edib ki, döyüş meydanlarına cəlb olunan hərbi texnika və silahlar Amerikada ədalət sisteminin aləti olmamalıdır.

“Cəmiyyət insan orqanizmi kimidir, əgər immunitet sistemi zəifləyərsə, xəstələnər. Cəmiyyət öz canlılığını qorumazsa, ümidlərini itirərsə, o halda cinayəti körükləməyə başlayar, bu isə, öz növbəsində iğtişaşlara gətirib çıxarır. Adətən, hərbiləşdirilmiş qüvvələrin insanlara arasında, sanki, işğalçı qüvvələr təəssüratı yaratdığını müşahidə edirik. Halbuki onların vəzifəsi insanları qorumaq və onlara xidmət etməkdir”.

Obamanın əmrinə əsasən, polisin qranat, süngü, zirehli avtomobillər, çapı 50 kalibrdən böyük olan silahların istifadəsi qadağa olunub. Hökumət polis idarələrini bu cür silahlarla təmin etməyəcək.

Amerika Birləşmiş Ştatlarının Baltimor və Ferqüson şəhərlərində polisin qaradərili vətəndaşları öldürməsi ilə əlaqədar ölkədə irqi ayrıseçkilik zəmində qarşıdurmalar son dövrlərdə daha da artmışdı.