“O qədər sırtıqlaşıblar ki, qollarımızı arxaya burmağa çalışırlar...” LUKAŞENKO RUSİYA HAQDA

Belarus prezidenti Aleksandr Lukaşenko növbəti dəfə Rusiyanın ünvanına sərt mesajlar verib.

Virtualaz.org xəbər verir ki, Lukaşekonu qəzəbləndirən “Rosselxoznadzor”un ötən gün Belarusdan Rusiyaya alma və armud idxalına qadağa qoymasıdır.

Bu qadağa ilə bağlı Lukaşenko hökumətin iqtisadi blokunun yığıncağını keçirib. O yada salıb ki, mart ayında Rusiya Türkiyə armudlarının Belarus üzərindən ixracını qadağan etmişdi. Lukaşenkonun sözlərinə görə, bütün bu addımlar Rusiya bazarının Belarus üçün bağlanması deməkdir.

Belarus prezidenti Rusiya ilə qarşılıqlı münasibətlər haqda danışaraq deyib ki, il yarım əvvəl Belarus üzərindən keçən neft və neft məhsulları kəmərinin təmiri zərurəti yaranmışdı. O zaman kəməri bağlamaq lazım idi, amma Minsk bunu eləmədi, çünki Rusiyaya ziyan dəyərdi. Nəticədə kəmərlərdə təmir avral rejimdə həyata keçirildi. İndi isə Lukaşenko zərurət yarananda kəmərlərin bağlanacağını deyib.

“Çünki bizim Rusiya üçün xeyirxahlığımıza onlar daim şərlə cavab verirlər. Orada o dərəcədə sırtıqlaşıblar ki, əllərimizi arxaya burmağa başlayıblar”-Lukaşenko deyib. O, Belarusun “müvafiq cavab addımları” atacağını deyib və hökumətə tapşırıb ki, gələn həftə vəziyyətlə bağlı məruzə etsin.

Kremlin sözçüsü Dmitri Peskov isə deyib ki, Lukaşenkonun belə qiymətləndirməsi ilə razı deyil və Rusiya Belarusa qarşı sanksiya tətbiq etmir.