Deputat: Mehriban Əliyevanın bu addımı bütün cəmiyyətə mesajdır

Milli Məclisinin deputatı, Parlamentin əmək və sosial siyasət komitəsinin sədri Hadi Rəcəbli Azərbaycanın Birinci Vitse-Prezidenti Mehriban Əliyevanın göstərişi ilə aprel döyüşləri şəhidinin banka olan borcunun bağlanılması addımını təqdir edib.

AzNews.info-nun məlumatına görə, H.Rəcəbli “Ölkə.Az”-a açıqlamasında deyib ki, Mehriban Əliyevanın bu cür addımı bütün cəmiyyətə mesajdır:

“Mehriban xanımın bu addımı bütün cəmiyyətə, millətə və xalqa bir mesajdır ki, bütün imkanlı və vəzifəli adamlar şəhid ailələrinə və Qarabağ əlillərinə diqqət və qayğı göstərməlidir. Mehriban Əliyevanın atdığı bu addım da həmin siyasətin bir təzahürüdür. Ona görə də düşünürəm ki, Mehriban xanım Azərbaycanın xeyirxahlıq və mərhəmət rəmzidir. Onun atdığı addımlar bütün Azərbaycan xalqına və camaatına hörmətdir”.

Komitə sədri bildirib ki, hazırda Yeni Azərbaycan Partiyasının təşəbbüsü ilə 40 nəfər aprel döyüşçülərinin ailə üzvləri Lənkəranda dincəlirlər:

“Bu da Yeni Azərbaycan Partiyası rəhbərliyinin bu istiqamətdə atdığı böyük addımlardan biridir. Yəni, hakim partiya öz Aparatının işçilərinə deyil, məhz aprel döyüşləri iştirakçılarının ailə üzvləri üçün bu cür şərait yaradıb. Bütün bunlar məmurlara və imkanlı adamlara bir çağırışdır ki, şəhid ailələrinə və Qarabağ əlillərinə daim diqqət və qayğı göstərilsin”.

Xatırladaq ki, “Para” BOKT ASC aprel döyüşləri şəhidi Xaliq Əzizzadənin kredit borcunu bağlayıb.

Bu barədə millət vəkili Qənirə Paşayeva məlumat verib.

Q.Paşayeva qeyd edir ki, “Para” BOKT ASC- yə və idarə heyətinin sədri Vəli Quliyevə təşəkkürlər:

“Şəhid qardaşımız Xaliq bəyin ailəsinin banka borclarını bağışladılar və bununla bağlı sənədləri şəhidimizin valideynlərinə verdilər. Eyni zamanda ölkəmizin Birinci Vitse-Prezidenti Mehriban xanım Əliyevaya xüsusi təşəkkür edirik. Mehriban xanımın köməkçisi Anar Ələkbərov zəng edib şəhidimizin anası ilə danışdı və dedi ki, şəhid ailələri Mehriban xanımın xüsusi diqqətindədir. Ailənin qayğıları ilə maraqlanıb, hər zaman yanınızdayıq dedilər”.

Onu da bildirək ki, “Para” BOKT ASC-nin təxminən 100 min manat kredit borcuna görə aprel şəhidini məhkəməyə verdiyi bildirilirdi.