Ərdoğan xalqa smartfon vasitəsi ilə müraciət etməsinin səbəbini açıqlayıb

Türkiyə prezidenti Rəcəb Tayyip Ərdoğan bu gün CNN telekanalına müsahibəsində ölkədə çevrilişə cəhd zamanı gecə saatlarında xalqa smartfonla FaceTime proqramı vasitəsi ilə müraciət etməsinin səbəbini izah edib.

Oxu.Az xəbər verir ki, dövlət başçısının sözlərinə əsasən, o bu addımı vətəndaşların milli telekanalları izləmək imkanı olmaması səbəbindən atıb.

Ərdoğan qeyd edib ki, hadisələr baş verən zaman ailəsi ilə birlikdə Marmarisdə istirahətdə olub.

Müraciət qiyamçılar tərəfindən nəzarətə götürülməyən CNN turk telekanalı vasitəsi ilə yayımlanıb.

Xatırladaq ki, iyulun 16-na keçən gecə Türkiyədə dövlət çevrilişinə cəhd baş verib.