Ermənistanda növbədənkənar seçkilərin keçirilməsi tələb edilib

Ermənistanın müxalif İrs Partiyası Ermənistan Polisinin Patrul-mühafizə polkunun Erebuni rayonunda yerləşən binasının zəbt edilməsi ilə bağlı olayda Ermənistan hakimiyyətinin günahkar olduğunu bəyan edib.

AzNews.info-nun məlumatına görə, APA “RİA Novosti” agentliyinə istinadən xəbər verir ki, İrs Partiyası situasiyanın kökündən dəyişməsi üçün Ermənistanda növbədənkənar prezident və parlament seçkilərinin keçirilməsinə çağırıb.

Bəyanatda vurğulanıb ki, Ermənistan hakimiyyəti ölkənin qarşısında duran problemləri seçki prosesi və qanun çərçivəsində yox, həmişə qanunsuz və güc tətbiqi yolu ilə həll etməyə çalışır.

İrs Partiyasının lideri Ermənistanın sabiq xarici işlər naziri Raffi Ovannisyandır. Partiyanın parlamentdə 4 deputatı var. Erməni diasporu ilə sıx əlaqədə olan partiya qərbyönümlü imici ilə tanınır.

Qeyd edək ki, bu gün səhər “Yeni Ermənistan” İctimai Xilas Fondunun silahlı üzvləri Ermənistan Polisinin Patrul-mühafizə polkunun Erebuni rayonunda yerləşən binasını zəbt edib. Polk rəisinin müavini öldürülüb, 3 polis əməkdaşı yaralanıb. Silahlılar 7 polis əməkdaşını girov götürüb.