Ərdoğan Azərbaycan xalqına salam göndərdi – VİDEO

Türkiyədə izdihamla keçən partiya qurultayında Prezident Rəcəb Tayyib Ərdoğan partiyası ilə vidalaşıb.

ANS TV-nin məlumatına görə, Ərdoğan AKP tərəfdarlarına qərənfil paylayıb. Vida çıxışında Türkiyənin 81 vilayətindən 40 minə yaxın insanın qurultay üçün Ankaraya gəldiyini bildirən Rəcəb Tayyib Ərdoğan, bura gələn vətəndaşların bərabərlik nümayiş etdirdiklərini vurğulayıb. Vətəndaşlardan halallıq istəyən Ərdoğan, özü də haqqını onlara halal edib. Ərdoğan deyib ki, missiya dəyişmir, sadəcə adlar dəyişir. O, nitqində dövlət təşkilatlarından yaralanaraq siyasət formalaşdıran paralel təşkilata səslənib. Bəzi müxalif partiyaları da paralel dövlətə işləməkdə ittiham eləyib. Andiçmə məraminə qatılmayan müxaliflərə "Biz heç nə itirməyəcəyik, itirən onlar olacaq" mesajını verib.

Türkiyənin yeni prezidenti Rəcəb Tayyib Ərdoğanın sözlərinə görə, ”Burdan bizi sevsin, ya da sevməsin, 77 milyona əlimi uzadıram”.

Hakim “Ədalət və İnkişaf Partiyası”nın yeni sədri baş nazir Əhməd Davudoğlu seçilib. Davudoğlu partiyanın siyasi kursunun davam edəcəyini və yeni Türkiyənin formalaşacağını da vəd edib.

Türkiyənin baş naziri Əhməd Davudoğlu isə deyir ki, “Davam edəcək olan bu yürüşümüzü gələcək nəsillərə təhvil vermək üçün hər şeyə hazırıq. Yeni Türkiyənin psixoloji əsası özünəinamdır”.

Prezident Ərdoğanın baş nazir Davudoğluna yeni hökuməti formalaşdırmaq tapşırığı verəcəyi gözlənilir. AKP-nin qurultayında Azərbaycanın hakim partiyasının nümayəndələri də iştirak edib. Bu gün nümayəndə heyətinin üzvləri Rəcəb Tayyib Ərdoğan və baş nazir Əhməd Davudoğlu ilə görüşüblər. Yeni Azərbaycan Partiyasının icra katibinin müavini, millət vəkili Siyavuş Novruzov ANS-ə bildirib ki, görüşdə Ərdoğan Azərbaycan xalqına salamlarını çatdırıb və bildirib ki, sentyabrın 2-də Azərbaycana səfər edəcək.

Siyavuş Novruzov onu da bildirib ki, qurultaya Ermənistandan heç kim qatılmayıb. Lakin sabah prezidentin inaqurasiya mərasimində Ermənistanın xarici işlər naziri Edvard Nalbandyanın iştirakı gözlənilir. Nalbandyanın Ərdoğana qondarma erməni soyqrımının 100 illiyində iştirak dəvətnaməsi təqdim edəcəyi deyilir. Andiçmə məramisində Azərbaycanı isə Baş nazir Artur Rasizadənin rəhbərlik etdiyi nümayəndə heyəti təmsil edəcək.