Taravneh: "Qarabağla bağlı mövqeyimiz dəyişməzdir"

İordaniya Azərbaycan üçün dost, qardaş ölkədir. Azərbaycan xalqı İordaniyanın Ermənistan-Azərbaycan, Dağlıq Qarabağ münaqişəsinin həlli ilə bağlı nümayiş etdirdiyi ədalətli mövqeyi hər zaman yüksək qiymətləndirir.

AzərTac xəbər verir ki, bu fikir İordaniyada keçirilən qadın parlament üzvlərinin Qlobal Forumunda iştirak edən Milli Məclisin deputatı Qənirə Paşayevanın İordaniya parlamentinin Nümayəndələr Palatasının sədri Atef Taravneh ilə görüşündə səsləndirilib.

Azərbaycanın hər zaman dost İordaniya ilə münasibətlərin inkişafına önəm verdiyini və bütün istiqamətlərdə ikitərəfli münasibətlərimizin inkişaf etdiyini deyən deputat İordaniya Senatının Xocalı soyqırımını tanıması, Ermənistanın insanlıq əleyhinə yönəlmiş bu vandalizm hərəkətlərini qətiyyətlə pisləməsi ilə bağlı qəbul etdiyi sənədi, bəyanatı xalqımızın yüksək qiymətləndirdiyini deyib. O, Azərbaycanın da bütün beynəlxalq platformalarda hər zaman İordaniyaya böyük dəstək verdiyini vurğulayıb.

Milli Məclisin deputatı Nümayəndələr Palatasının sədrini Ermənistan-Azərbaycan, Dağlıq Qarabağ münaqişəsi ilə bağlı son vəziyyət, Ermənistanın bölgədə həyata keçirdiyi təxribatlar, dinc azərbaycanlılara iriçaplı silahlardan atəş açması barədə məlumat verib. O, Qarabağ həqiqətlərinin dünyada daha geniş yayılması, Xocalı soyqırımının tanıdılması istiqamətində Azərbaycanın gördüyü işlərdən danışıb və bildirib ki, bu məsələlərdə bundan sonra da qardaş İordaniyanın dəstəyinə ehtiyac var.

Atef Taravneh ölkələrimiz arasında əlaqələrin inkişafının məmnunluq doğurduğunu söyləyib. O, əməkdaşlığın daha da inkişaf etdirilməsi istiqamətində daha çox səy göstərilməsinin önəmini qeyd edib və yaxın zamanlarda Azərbaycana səfər etmək niyyətində olduğunu deyib. Parlamentin Nümayəndələr Palatasının sədri Dağlıq Qarabağ münaqişəsi, Xocalı soyqırımı ilə bağlı İordaniyanın birmənalı mövqeyinin olduğunu və bunun heç zaman dəyişməyəcəyini vurğulayıb.

Milli Məclisin deputatı rəhbərlik etdiyi Avrasiya Beynəlxalq Araşdırmalar İnstitutu İctimai Birliyinin hazırladığı və içərisində Qarabağ həqiqətlərini, erməni yalanlarını əks etdirən sənədli filmlərin olduğu “Azərbaycan həqiqətləri” filmləri kataloqunu Atef Taravnehə hədiyyə edib.

Görüşdə Azərbaycanın İordaniyadakı səfiri Sabir Ağabəyov da iştirak edib.