Rəsmi Tehran ABŞ-ı oğru adlandırdı

ABŞ İranın 2 milyard dollarlıq varidatını müsadirə edib. ANS PRESS-in məlumatına görə, İran prezidenti Həsən Ruhani İran Mərkəzi Bankının ABŞ-dakı dondurulmuş varidatını təzminat adıyla müsadirə etməsini oğurluq adlandırıb.

“Oğru etdiyi əməlinin qarşılığını almayacağını düşünürsə yanılır”-deyə Həsən Ruhani baş verənlərə münasibət bildirərkən deyib.

Nazirlər Kabinetinin toplantısında çıxış edən Ruhani ABŞ Ali Məhkəməsinin müxtəlif terror hücumlarında həyatını itirənlərin ailələrinə verilməsi üçün İranın ABŞ-dakı 2 milyard dollar dəyərindəki malvarlığını müsadirə etməsini açıq-aşkar oğurluq və böyük hüquqi qalmaqal adlandırıb.

“İran xalqının malvarlığı yağmalana bilməz. Bu açıq aşkar oğurluqdur. Oğru etdiyi əməlin cəzasız qalacağını düşünürsə yanılır”- deyə Həsən Ruhani bildirib.

“Dünyanın başqa bir ölkəsində bir məhkəmə yaxud da o ölkənin qanunvericilik orqanının başqa bir ölkənin malvarlığı ilə bağlı qərar qəbul etməsi, beynəlxalq hüquqa zidd bir quldurluqdur”-deyən Həsən Ruhani ABŞ-a xəbərdarlıq edib:” Bu çətinliklərini görmədən uda biləcyiniz bir tikə deyil”-deyə vurğulayıb.